GMN TV Justica e Segurança PR Lú Olo fó Indultu ba Prizioneiru 11 no Kondekora Asua’in 52

PR Lú Olo fó Indultu ba Prizioneiru 11 no Kondekora Asua’in 52

201 views

Prezidente Repúblika (PR) Francisco Guterres Lú Olo, iha ámbitu komemorasaun Proklamasaun Independénsia Unilateral Timor-Leste nian ba dala 46, deside fó indultu ba prizioneiru hamutuk 11.

Xefe Estadu fó indultu ka komutasaun pena ba prizioneiru hirak ne’e, bazeia ba kompeténsia Xefe Estadu nian, ne’ebé hatuur ona iha lei inan Konstituisaun RDTL, artigu 85 (Kompeténsia rasik), iha alinea i) Rona tuir Governu, atu fó perdaun ka hamenus kastigu.

Lú Olo hatete, pedidu ne’ebé aprezenta hosi Governu ba PR rasik hamutuk prizioneiru 36, maibé Xefe Estadu tetu konsege deside fó deit indultu ba prizioneiru 11.

Nia afirma, iha tipu krime balun ne’ebé mak lei bandu atu fó indultu ka komutasaun pena. Prezidente Repúblika labele hakat liu limite ne’ebé lei hateten biar PR hakarak fó liu tan indultu ka komutasaun ba reklozu ka dadur sira iha prizaun.

“Lei mós hatete katak, atu fó indultu ka halo komutasaun pena, tenke haree ba aspetu balun, hanesan: razaun umanitária iha ka lae, kapasidade prizioneiru nian atu integra fila-fali ninia moris iha sosiedade no komportamentu iha prizaun laran,” dehan Lú Olo nia diskursu, iha seremónia proklamasaun independénsia ba tinan ne’e, iha Baucau Domingu (28/11).

PR mós halo análiza ba relatóriu sosiál no avaliasaun prizionál kona-ba prizioneiru sira, no sira-nia família ninia moris no tetu mós paresér hosi Tribunál no Prokuradória Jerál Repúblika.

“Hafoin tetu ida-idak ninia situasaun ho fatór sira nee hotu, Prezidente Repúblika deside fó indultu ba prizioneiru sanulu resin ida, iha loron ohin” tenik.

Tuir komunikadu ne’ebé GMN asesa hosi pájina ofisiál Prezidensia Repúblika, rekluzu na’in 11 ne’ebé hetan indultu mak hanesan, Albertino Freitas Magno, Atanásio Ribeiro Belo, Domingos Gusmão Marques, Gerónimo Marques, Luis Marques, Mateus Boavida Marques, João Guterres, Abreu Ramos da Costa, Júlio Ximenes, Armindo Martins no Eliza da Conceição Gonçalves Noronha.

PR Lú Olo kondekora asua’in 52

Iha komemorasaun proklamasaun independénsia ba dala 46 ne’e mós, Prezidente Repúblika (PR) Francisco Guterres Lú Olo fó kondekorasaun ba asua’in kombatente libertasaun hamutuk 52 ho Ordem Timor-Leste.

Iha diskursu Xefe Estadu nian hatete, restaurasaun independénsia tama iha ita-nia istória nu’udar konkista boot ida husi ita-nia kombatente libertasaun nasionál, husi frente hotu-hotu, husi mós solidariedade internasionál. Too ikus, konkista husi ita nia povu.

“Nune’e mak ha’u, ho onra no orgullu, kondekora ohin (horiseik), ho naran Estadu nian, ita-nia asua’in na’in 39, ho Ordem Timor-Leste,” dehan PR Lú Olo, iha komemorasaun proklamasaun independénsia ba dala 46, iha Baucau Domingu (28/11).

Nune’e mós ho onra no orgullu mak ha’u kondekora hamutuk asua’in 13 ne’ebé mate iha funu laran, ka hafoin ita restaura ita-nia independénsia.

Xefe Estadu mós fó omenájen espesiál ba eroína, erói no mártir sira hotu, instituisaun relijioza sira hotu iha rai-laran, nomós ba diplomata na’in lima ho dedikasaun eskluzivu nomós ba ativista timor-oan iha rai-liur, ne’ebé hala’o servisu, ho fiar metin, katak TL sei ukun-an.GMN


Banner

Foto

Notisia Ikus

Governu adia dikusaun ba pedidu reforma Lere Anan Timur

January 20, 2022
Reuniaun Konsellu Ministru (KM) iha Palásiu Gov...

La atende kontaktu deputadu nian, PPN “hirus” MOP Salvador

January 20, 2022
[caption id="attachment_59069" align="aligncenter"...

CNE seidauk simu lista kandidatura PR

January 19, 2022
[caption id="attachment_59064" align="aligncenter"...

Eis Padre Martinho Gusmão deklara kandidata-an ba PR

January 19, 2022
Eis padre Martinho Germano da Silva Gusmão anú...

Ministru José Agustinho “ameasa” hasai funsionáriu APORTIL 24

January 19, 2022
[caption id="attachment_59043" align="aligncenter"...
1 2 3 683

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker