Ministru Defeza no Seguransa, José Agustinho Sequeira `Somotxo` hateten, kilat Polísia Nasional Timor-Leste (PNTL) nian hamutuk 10 resin mak lakon durante krizi 2006, to´o agora seidauk hetan.
``Kilat iha 10 resin mak sei lakon. Tan ida ne´e mak ha´u halo apelu keta iha sivil nia liman karik intrega to´o dia 31 Dezembru,``esplika MDS José Agustinho Sequeira `Somotxo` Kinta (14/12/17), hafoin halo vizita haree Ro médiku China nian para iha Portu Díli.
Kona-ba kilat ilegal balun dehan deskonfia tama husi Atambua, mai Timor-Leste, Somotxo responde hodi hateten, asuntu ne´e nia sei la koalia ba públiku, ne´e uluk kedas.
``La´os ha´u Ministru mak informasaun ne´e mosu. Hanesan ita konta mós ita-nia kilat sira lakon 2006-2007, ha´u ninia preokupasaun ne´e mak ba forsa armadas nia kilat ho PNTL nia kilat lakon. Kilat ilegal ne´e hanesan so ita bele koalia kuandu hatene realidade,``dehan Somotxo.
Relasaun ho kilat ne´ebé mak seidauk rekolla bele fó impaktu karik mosu eleisaun antesipada ruma, Somotxo responde dehan, bele fó impaktu, maibe kiikoan.
Antes ne´e Xefe Estadu Maior F-FDTL Major Jeneral Lere Anan Timur mós deklara katak kilat ilegal deskonfia tama husi Atambua mai Timor-Leste.avi
