Membru VII Governu Konstitusional hanesan Ministériu Justisa, Ministériu Solidariedade Sosial, no Sekretariu Estadu Juventude no Traballu, selebra Natal hamutuk ho prizioneiru sira iha Prizaun Becora, hodi enkoraja no fo ksolok ba sira.
“Atividade Natal hamutuk ne’e, hetan apoiu másimu husi Governu, ne’ebé kada tinan tinan sempre selebra,”hatete Diretor Ezekutivu João Domingos ba jornalista sira iha nia kna’ar fatin Kuarta (20 /12/ 201) iha Prizaun Becora.
Nia afirma, festa Natal hamutuk ne’e, oinsa atu fo ksolok ba prizioneiru sira, atu sira la senti mesak, no la bele senti sira dook husi família.
Iha fatin hanesan, Ministra Justisa, Maria Angela Carrascalão, dehan, hanesan ema, dala ruma halo buat ruma ne’ebé la los, maibe iha mós tempu atu halo diak.
“Ita kuandu koalia Estadu Timor Leste, presija ita hotu. Tamba ne’e ita hotu tenki halibur no fo ita-nia esforsu maka’as atu bele harii Estadu ne’e ba oin, fo mós ha’u-nia domin bo’ot ba ita bo’ot sira hotu ho fiar katak, prizioneiru sira ne’e sei bele kontribui ba nasaun no sei bele moris diak iha futuru,”akresenta Ministra Justisa ne’e.
Alende ne’e, tuir dadus husi Diretor Ezekutivu Prizaun, Joao Domingos, katak, prizioneiru ne’ebé agora dadaun iha sela Prizaun Becora hamutuk 563.Oly
