Governu liu husi Sekretaria Estadu Juventude no Desportu (SEJD), sei foti medida ba konflitu sosial involve pesoal artemarisiais tolu, Persaudaran Setia Hati (PSHT), Ikatan Kera Sakti no Kmanek Oan Rai Klaran (KORK), ne´ebé mak taka ona, maibe pesoal sira nafatin halo konflitu iha komunidade nia leet.
Lia hirak ne´e hato’o husi Sekretariu Estadu Juventude no Desportu (SEJD), Nelio Isaac Sarmento, wainhira enkontru ho Komandante Jerál PNTL Komisariu Julio Hornay ho ofisial no superior sira iha Kuartel Jerál PNTL Díli ho Komandante PNTL Munisípiu Díli Superintendente Xefe Pedro Belo.
Nelio Isaac Sarmento, hateten, objetivu Komisaun Regulador Artemarsiais hamutuk ho Sekretaria Estadu Juventude Desportu hala´o sorumutu ho Komando PNTL atu partilha informasaun ba malu kona-ba artemarisiais tolu ne´ebé mak Governu taka ona.
``Ita hala´o sormutuk ida ho PNTL ita atu partilha informasaun nomós atu buka meius atu hare´e kona-ba organizasoens artemarsiais ne´ebé mak bandu taka la ezisti iha Timor oinsa foti medida ba konflitu sosial ne´ebé mak akontese nafatin iha ita nia komunidade ne´ebé involve artemarsiais ne´ebé mak la ezisti ona iha Timor”,esplika Nelio Isaac Sarmento.
Nelio Isaac Sarmento dehan, Governu seidauk iha planu atu reativa artemarisias tolu ne´ebé mak antes ne´e Governu taka ona
``Lei bandu totalmente reativa organizasoins tolu iha. Ne´e lei mak koalia portantu seidauk hanoin atu reativa”,dehan Nelio Isaac Sarmento.
Tanba ne´e Komisaun Regulador Artemarsiais hakarak halo komunikasoens ida troka informasaun ho institusoins hotu para depois hato’o relatoriu kona-ba issu sira reativa ka la reativa artemarisias depois Governu bele fó informasaun klaru ba povu, povu labele rona informasaun ne´ebé mak lalos.
``Ne´e mak meus ami halo ne´e troka informasoins ho Polísia, la´os de´it Polisia maibe ami mós partilha ho F-FDTL oinsa fó ba Estadu. Pareser ida sei mai husi Komisaun Regulador Artemarsiais atu fó ba Estadu katak, ita nia frakeza ne´e iha ne´ebé karik lei mak ladun forte ka ou karik koordenasaun entre instituisaun sira atu hare´e kazu artemarsiais sira ou karik instituisaun sira ne´ebé mak tangani kona-ba artemarsiais iha membru ida rua involve iha organizasoins ne´ebé mak ita bandu, ita buka atu identifika untuk sementara ha´u labele koalia ba ita boot``,dehan Nelio Isaac Sarmento.
Wainhira jornalista sira tenta konfirma ho Komadante Jerál Komisariu Julio Hornay, kona-ba medida saida mak PNTL sei foti hasoru pesoal artemarsialis tolu ne’e, maibe Julio Hornay, lakohi fo komentrariu, ho razaun katak, Seckretariu Estadu Juventude no Desportu (SEJD) Nelio Isaac Sarmento fó ona esplikasaun.avi
