Prokurador Jacinto Babo eleitu ba Prokurador Distrital Dili no prokuradora Remizia Fátima eleito ba Prokurador Distrital Baucau, nune’e iha loron Segunda (10/12/2018) prokurador nain rua ne’e simu pose husi Prokuradoria Jeral Repúblika (PJR) , Jóse Ximenes da Costa hodi bele halao ona sira nia knaar.
Iha diskursu PJR, Jóse Ximenes da Csota hatete, kargu Prokurador Distrital hanesan kargu konfiansa nune’e lao’s deit sai Prokurador ne’ebé diak maibe tenki sai jestor ne’ebé diak atu nune’e labele hamonu konfiansa ne’ebé fo, tanba dala barak fasil atu koalia maibe susar implementa.
“Ita hotu hatene katak depois de tomada de pose ba Alfonso Lopes ikus mai konsellu deside hodi delibera substituisaun no konsellu hare katak presija iha mudansa iha nivel Distrital hodi hadia no hametin liutan servisu Prokurador da Republika Distrital sira tanba ne’e konsellu delibera deside Jacinto Babo ho xefia kargu Distrital Dili no hare mos situasaun balun iha Baucau hodi transfere fali doutora Ivonia mai Dili no nomeia fali Remizia de Fátima hodi asumi kargu hanesan Prokuradora da Republika Distrital Baucau”,informa PJR, José ba jornalista sira hafoin fo pose ba Prokurador Jacinto no Prokuradora Remizia iha ninia knar fatin Colmera, Segunda (10/12/).
Jóse konsidera kargu rua ne’e importante tanba kriminalidade lao’s akontese deit iha Dili maibe iha mos municipiu sira, tan ne’e konsellu fiar hodi tau konfiansa ba sira ho kapasidade teknika no lideransa ne’ebé iha bele reforsa liutan ekipa PJR, tanba ekipa PJR kompostu husi PJR rasik, adjuntu no Prokurador Distrital sira.
Iha fatin hanesan, Prokurador Distrital Dili Jacinto Babo kompromete atu kontinua no hadia tuir kapasidade no maneira ne’ebé nia iha no nia konsidera ne’e hanesan servisu bo’ot ba nia, tanba asumi knar rua hanesan Prokurador ba titular iha Gabineti Kombate Korupsaun no Prokurador da Republika Distrital Dili.
“ Maibe hau iha ona planu oinsa atu bele jere tempu maibe hakarak ka lakohi kargu rua ne’e tenki lao hanesan,”dehan Jacinto.
Iha sorin seluk, Remizia sei buka hatene uluk prosesu investigasaun iha terenu iha Munisipiu Baucau atu nune’e bele servisu hamutuk ho ekipa hodi trasa planu ne’ebé diak iha futuru atu nune’e bele aselera justisa ba ema hotu.
“Iha ne’eba iha mos kazu korupsaun no liga ho kazu Mauk Moruk maibe hau seidauk hatene nia prosesu to’o ona iha ne’ebé maibe en prinsipiu sei hare hodi fo prioridade ba kazu ne’ebé uluk,”dehan Remizia.
Nia kompromete sei implementa no fo justisa ne’ebé hanesan ba ema hotu tuir kapasidade no esperiensia ne’ebé iha ona.
Prokurador Distrital nain rua nei sei asumi sira nia kargu durante pe durante periudu tinan tolu.Ita
