Komando Polísia Nasionál Timor-Leste (PNTL) Munisípiu Díli hala´o ona prosesu investigasaun ba kazu entre joven sira asalta malu iha Hudi-Laran hodi promove ba Ministériu Públiku (MP) hodi hasai mandadu detensaun ba suspeitu sira ne´ebé mak sira-nia imajen publika iha Facebook.
``Tanba ne´e mak ami husu ba media no públiku fó oportunidade ba PNTL hodi promove kazu ne´e. Ami halo ona pedidu ba Tribunal kona-ba akontesimentu ne´e, prosesu ne´e sei han tempu, maibe prosesu ne´e toleransia laiha. Tanba ne´e mak promosaun ami halo ona, espera sedu ka tarde suspeitu ne´ebé mak ami identifika ona sei submete ba prosesu kriminal``, esplika Segundu Komandante PNTL Munisípiu Díli ba jornalista sira Tersa (04/12/18) iha Kuartel PNTL Kaikoli Munisípiu Díli.
Enkuantu kona-ba numeru suspeitu sira ne´ebé mak involve iha kazu ne´e, Euclides Belo la esplika sai ba públiku.
``Hanesan ita boot sira ne´ebé mak ita akompaña iha facebook, ami husu kedas mandadu ba Ministériu Públiku``, dehan Euclides Belo.
Kona-ba motivu husi akontesimentu ne´e, sei iha segredu prosesual.
``Tanba ne´e mak ami hein mandadu sai sei kaptura suspeitu sira, motivu ne´ebé mak ita boot sira husu sai hanesan materia ba investigasaun kriminal ou Ministériu Públiku hodi investiga suspeitu sira``,dehan Euclides Belo.avi
