Eis Prezidenti Repúblika (PR), José Manuel Ramos Horta, hatete katak, situasaun seguransa jeralmente iha territóriu Timor-Leste (TL) la’o di’ak.
Lauriado Nobel da Paz 96 hato’o lia hirak ne’e ba Jornalista foin lalais ne’e iha Metiaut Díli.
“Ha’u haree situasaun seguransa iha Timor-Leste kalma, ha’u koalia bebeik ho setor Defeza no Segurança simu informasaun nudar eis Prezidenti Repúblika , ita tenke buka informasaun lolos mai husi institusoens Estado nian. No informasaun ne’ebé hau rasik hare ho hau nia matan, situasaun segurança diak, hau hanoin iha timor, tanba uluk ne’e povu terus iha konflitu, buat ki’ik ko’an ida akontese hot-hotu tauk, nakdedar, preukupadu. Hau hanoin problema joven no grupu artemarsial balu, halo problema, la’os grupu artemarsial balu deit mak halo problema, maibe apoiante futebol mos halo, hanesan iha inglatera apoiante futebol maka halo liu problema”, hateten Eis PR, José Ramos Horta.
Maske nune’e, diplomata senior ne’e mos afirma, akontese krime aleinde responsabilidade Polísia nian, Polísia mos iha kompetensiaa atu rezolve rasik liu husi mediasaun.
“Problema ne’ebé mos responsabilidade Polísia nian, Polísia maka investiga, rezolve, tanba Polísia la’os atu halo intervensaun deit, mas Polísia mos bele mediasaun, prevensaun, bele halo dialogu iha suku no aldeia. Ne’e papel Polísia nian, maibe ita mos estuda hodi haree klean abut problema ne’e mai husi ne’ebé, buka rezolve ho dialogu”, esplika Horta.
Eis Prezidente Repúblika hatete, Timor Leste ne’e uluk ema barak mate, tanba violência oi-oin, ita nia Polísia no Forsa rasik tenke sai hanesan modelu ida iha Mundu, maibe joven sira mos tenke sai modelu ida iha mundu, labele provoca fali Polísia no labele provoca malu, no Polísia halo intervensaun, nune’e hirus ona.
Antes ne’e, Primeiru Ministru, Taur Matan Ruak mos deklara ona katak, louva tebes maturidade Joventude sira nian, maske mosu insidenti balu, mas la’os maioria jovem.
Nunee mos, Segundu Komandante Municipiu Díli, Superentendenti Asistenti Polísia, Euclides Belo, informa ona katak, iha festa natal mosu duni infrasaun, maibe la la resulta vitima grave. mia
