Peskizador Fundasaun Mahein, Sancho Xavier, konsidera Ministériu Públiku ho Polísia Nasionál Timor-Leste (PNTL), hatudu frakeza iha públiku, tanba duun malu fali iha prosesu aplikasaun Termu Identidade Rezidensia (TIR) ba suspeitu JVRSS, ne’ebé mak soke mate aman ho oan iha Praia dos Coqueiros, Díli foin lalais.
Tuir Sancho Xavier, lolos ne’e institisaun Estadu rua ne’e ténki kolobora ho diak hodi prosesu kazu ne’e ho lalais, la’os duun malu fali.
“Justisa ne’e lolos segredu, iha ne’ebé sira bele halo investigasaun, depois hasai rezultadu investigasaun ba públiku atu nune’e familia vítima bele satisfas, la’os mai fali iha públiku duun malu fali, ida ne’e hatudu de’it frakeza justisa ba públiku. Ha’u hanoin ida ne’e hatudu ita nia frakeza justisa ba públiku, tanba ema sira familia vítima ne’e hein hela prosesu justisa,”esplika Peskizador Fundasaun Mahein Sancho Xavier, ba GMN Kinta (19/12/19) iha Fomento Díli.
Antes ne’e Segundu Komandante PNTL munisípiu Díli Superintendente Assistente Euclides Belo hateten, PNTL munisípiu Díli aplika TIR ba suspeitu JVRSS tanba simu orientasaun husi Minisériu Públiku.
Maibé Prokurador Jerál Repúblika José Ximenes, foin lalais rezeita deklarasaun Euclides Belo, tanba Ministériu Públiku la fó orientasaun hodi aplika TIR ba suspeitu.
Kazu asidente tráfegu ne’e akontese iha loron 30 fulan Novembru tinan ne’e iha praia dos Coqueiros, rezulta Nonato Lopes no Jonathan Borges Lopes, núdar aman no oan mate iha fatin.avi
