Lere preokupa ho situasaun F-FDTL-PNTL

Xefi Estadu Maior Jeneral Falintil-Forsa Defeza Timor Leste (F-FDTL), Major Jeneral Lere Anan Timur, hafoin hasoru malu ho Prezidenti Republika (PR), Taur Matan Ruak iha Palácio Prezidensial Aitarak Laran, Dili, Kuarta (26/04/2017) hodi hato’o preokupasaun konaba instituisaun F-FDTL ho PNTL ne’ebe sempre iha problema.

Lere Anan Timur informa liutan konaba situasaun forsas ni’an ne’ebe sempre sai preokupasaun tanba instituisaun Polisia Nasional ho F-FDTL nian nu’udar seguransa kumpri lei orden no mantein estabilidade rai laran nian, maibe membru polisia ho polisia no forsa nian iha problema.

“Ita hatene katak instituisaun rua ne’e mak asegura lei no orden, establidade iha ita nia rai laran, tanba ne’e mak ita preokupa dala ruma problema mosu entre membru polisia ho polisia ho membru F-FDTL maibe, ami nain rua sempre rezolve hanoin ate agora situasaun di’ak hela to’o agora,” dehan, Major Jeneral Lere Anan Timur, ba Jornalista sira iha Palásiu Prezidensial, Kuarta (26/04/2017).

Maske nune’e, Lere Anan Timur dehan situasaun sira akontese tanba buat hotu la’os la’o di’ak deit sempre atravesa ho problema sira ne’e, maibe kestaun mak lider sira ne’e mak tenke jere didi’ak rezolve problema sira ne’e.

Lere esplika jere didi’ak problema sira ne’e katak sei haree grau de pezu husi problema ne’e rasik hodi nune’e lider instituisaun ni’an toma desizaun tuir todan ou pezu tuir problema ne’ebe mosu, ezemplu hanesan problema Oe-Cusse toma ona desizaun ba alferes ida ho sarjentu ida.

Lere afirma katak nu’udar forsa la’os uza para rezolve problema nu’udar ema matenek lori ninia matenek mak bele rezolve problema, maibe lorin fali kilat ba rezolve problema entaun la hadomi instituisaun di’ak liu hasa’i.

“Do que ha’u obriga ita bo’ot iha ne’e para aban bainrua ita bele estraga instituisaun, la’os estraga instituisaun deit ita bele dehan estraga Estadu tomak, tanba ne’e konaba Oe-Cussi nian sira nain rua ha’u hasai ona,” Lere Anan Timur informa.

Nune’e mos, Lere Anan Timur esplika katak, konaba viajen ba iha Portugal hodi tuir reuniaun ho Xefia CPLP nian.

“Ha’u informa konaba ha’u nia servisu, ne’ebe Prezidenti Republika hatene foin lalais ha’u ba Portugal reuniaun ho Xefia CPLP ninian, no husu mós konaba situasaun forsas iha rai liur ne’eba, no mos situasaun forsa rai laran,” informa Lere.eus