Rezultadu autopsia, Natalia Judith mate tamba sofre korasaun

Rezultadu autopsia husi dotor Patolojia Hospital Nacional Guido Valadares (HNGV) hatudu katak, Manager Restaurante Food L Do, Natalia Judith  Isabel, mate tamba sofre moras korasaun.

“Kazu  senhora Natalia Judith Isabel  ne’ebé akontese iha dia 6 de Abril 2017, iha Timor Plaza, los duni  senhora  ida mate  iha  restaurante laran, depois iha dia 10 de Abril 2017 ita hamutuk ho HNGV halo prosesu autopsia, depois iha rejultadu autopsia ne’e rasik hatudu katak, senhora ne’e mate, tamba sofre korasaun, maibe kazu ne’e rejista tiha  ona iha MP, ita hein prosesu ne’e sei la’o hela,”Komandante Investigasaun Kriminal interino, Superintendente Chefi, Carlos Jeronimo, informa ba  jornalista  sira Kinta (20/04/2017) iha Kuartel Jeral PNTL Dili.

Kona-ba patraun Restaurante Food Ldo, Paul Stevenson, diskonfia halai sai husi Dili Timor-Leste, Carlos Jeronimo responde katak, Polisia laiha informasaun konaba ida ne’e.

“Ita labele hateten deit patraun ne’e halai, ema ida hapara ema ninia movimentu mós tenki tuir lei, ne’ebé to’o agora ami seidauk hatene kona-ba situasaun ida ne’e,”esplika Carlos Jeronimo.

Iha parte seluk tuir observasaun JN-Diário iha Kuarta (19/04/2017) semana ne’e haree katak, restaurante Food  L Do n’ebe lokaliza iha Timor Plaza  ne’e sei taka hela no laiha atividade ruma iha restaurant refere.

Relasiona observasaun ne’e Komandante Investigasaun Kriminal Interino, Carlos Jeronimo hateten, Polisia labele dehan patraun ne’e atu kontinua ninia negosiu ka lae, tamba kna’ar Polisia mak oinsa prosesu kazu  ba iha MP.

“Se nia senti tamba ho situasaun ne’e mak nia tauk, nia tenki hakbesik ba autoridade seguransa para haree situasaun ne’e oinsa. Mas  to’o agora ami senti katak seidauk akontese buat ruma ba restaurante nain Food L Do ne’e,”tenik nia. avi

Leave a Reply

Your email address will not be published. Required fields are marked *