Konflitu mosu entre joven sira, tanba tau interese pesoal aas liu hotu

Bispu Diocese Díli, Dom Virgílio do Carmo da Silva SDB hateten, konflitu ne’ebé mosu entre joven sira iha tempu ikus ne’e iha fatin fatin tanba, tau interese pesoal no grupu nian aas liu hotu.

”Buat hirak ne’ebé mosu hanesan oho no estraga malu, tanba ita tau ita nia interese pesoal no grupu nian aas liu hotu. Maibé ita hotu mesak timoroan no sarani ita buka hakaas-an atu tau ba kotuk buat ne’ebé diferensia no fahe ita”, hateten Dom Virgílio do Carmo da Silva ba jornalista sira hafoin prezide misa erasaun kuaze parokia Railaco sai nu’udar Parokia no inaugura igreja foun Nossa Senhora de Fatima Railaco, Munisípiu Ermera, Sábadu (8/10).

Tanba ne’e lideransa máximu Diocese Díli ne’e husu ba joven sira atu haka’as-an hodi labele sai instrumentu ba ema seluk nia interese. Durante fulan kotuk to’o Outubru agora ne’e, kazu homisídiu hat mak akontese iha Díli no munisípiu sira seluk no konfrontu balun ne’ebé akontese hotu-hotu involve juventudi sira.ías