Membru UPF ameasa povu ho pistola

Membru Polisia Unidade Patrollamentu Fronteira (UPF), ho kondisaun lanu ameasa atu tiru komunidade ho pistola, iha seremonia koelheta ikan iha lagoa be malae, Postu Administrativu Balibo, Munisípiu Bobonaro.

Vítima Domingos da Costa ne’ebé hetan ameasa husi membru UPF ne’e, kondena maka’as hahalok husi pesoal UPF ne’e.

“Pesoal seguransa ida, eis Komandante UPF mak horikalan halo problema mai ha’u, dada pistola ba ha’u, mak ohin loron ha’u lakohi halo atividade,” relata Domingos da Costa ba GMN iha Lagoa be malae Balibo, Sabadu (07/10).

Domingos la simu hahalok ida ne’e, tanba membru polisia ne’e atu fó seguransa ba povu, la’os lori fali kro’at Estadu nian hodi ameasa fali povu.

“Ha’u la simu, se karik ha’u-nia maun alin sira husi parte Balibo ne’e mak halo problema mai ha’u, ha’u simu. Maibé pesoal seguransa nasaun nian mak ameasa fali ha’u ho pistola ne’e, ha’u la simu,” relata nia.

Nia afirma, atividade animasaun hotu iha Lagoa be mala’e ne’e, legal hotu tanba lisensa sai husi autoridade lokal sira Munisípiu ne’e nian.

“Ha’u laiha problema individu ho pesoal seguransa ne’e, tanba ha’u nunka koñese ema ne’e, foin primeiraves ami hasoru malu, no halo kedas problema mai ha’u. Nia mai tolok ha’u, ko’alia liafuan at barak mai ha’u, no tuku ha’u nia layar nakfera,” afirma nia.

Domingos lamenta katak, tanba saida mak pesoal seguransa Estadu no povu nian ne’ebé hatais sivil, lori fali pistola la’o ba mai iha povu nia leet hodi ameasa povu hanesan ne’e.

Komandante Polisia Unidade Patrulhamentu Fronteira, Superintendente João Belo dos Reis, rekoñese aktus ida ne’e akontese duni, maibé  rejeita katak, la’os membru UPF mak halo.

“Ha’u cross check ona ho ha’u-nia diresaun tomak, UPF nian kona ba informasaun ida ne’e, maibé la’os membru UPF mak halo asaun ne’e, ida ne’e membru husi komponente balu mak halo ameasa ne’e,” katak João Belo dos Reis.

Nia haktuir, komponente UPF la taka dalan ba povu atu halo keixa kona ba kualker informasaun ne’ebé relasiona ho membru UPF sira nia atuasaun.

“Ami loke dalan ba populasaun hotu atu hato’o keixa tanba ami iha seksaun justisa, atu bele prosesa kazu ruma, karik populasaun ruma senti prejudikadu ho atuasaun membru UPF nian,”dehan nia.

Komandante Polisia Unidade Patrolhamentu Fronteira, Superintendente João Belo dos Reis, rejeita katak, aktus ne’e la’os membru UPF mak halo.cos