Ema deskoñesidu tuda rahun uma ida iha Marabia

Ema deskoñesidu tuda rahun vidru janela uma ida ha area Marabia, Suku Lahane Oriental, Posto Administrativu Nai Feto, Munisipiu Dili.

Akontesimentu ne’e dala rua ona tanba dahuluk iha loron Finadu, Kinta (2/11/2017), ema balun tuda rahun uma refere hodi halo labarik sira tauk no trauma.

Vitima Manuel da Costa ‘Tafui’ hanesan habitante nebe hela iha area Marabia  haktuir nia uma hetan tuda husi ema deskoenesidu, husi akontesementu ne´e rezulta vidru janela nian mak rahun.

Ba GMN iha nia horik fatin, Sesta (17/11/2017), Manuel da Costa hateten,  nia rasik la hatene motivu lolos husi kazu ne´e, tanba, nia hela iha area Marabia ne’e kleur ona, foin iha tinan 2017 ne’e mak ema deskoñesidu sira mai tuda hodi harahun vidru janela nian.

Manuel da Costa tenta ona informa ba parte autoridade seguransa ka polisia maibe seda’uk to’o iha fatin akontesementu.

“Há’u kontaktu ona parte seguransa maibe sedauk to’o mai hodi halo pre-eleminaria iah fatin akontesementu,” haktuir Manuel.

Observasaun Grupu Media Nasional iha treinu nota katak husi akontesementu ne’e la rezulta ema kanek, maibe vidru janel uma nian mak hetan estragus ka rahun tanba hetan tuda. eus