Ema baku membru PM ida iha Motael ”Suspeitu nain 5 submete ba prosesu

Alberto  Sarmento da Silva, tinan 30 hanesan soldadu FALINTIL Forsa  Defeza Timor-Leste (F-FDTL) husi Unidade Polisia Militar (PM) baixa  iha Hospital Nacionál Guido Valadares (HNGV),  tanba  deskonfia baku  husi joven nain 5.

Kazu  ne´e akontese,  iha Motael, Domingu (07/01/18),  tuku  3 madrugada OTL.

Iha akontesimentu ne´e,  soldadu militar Alberto hetan kanek  iha matan  fukun,  ibun  ain   no ulun fatuk besik tilun hetan pankada makaas.

Enkuantu  suspeitu   nain  5  ne´ebé mak involve iha kazu agresaun fíziku ne´e, submete ona ba prosesu  investigasaun iha loron Segunda (08/01/18)  iha Eskuadra Vera-Cruz Díli.

Tuir  observasaun, GMN haree katak, joven  nain lima  ne´e balun matan fukun bubu no ligadura bobar  haleu iha ren tos no  balun isin lolon kotuk laran mean hotu.

Remigio de Carvalho, juventude Maskanrinhas   ne´ebé mak  deskonfia involve iha kazu agresaun fíziku hasoru membru Polísia Militar Alberto  Sarmento da Silva, hafoin  hato’o tiha deklarasaun ba Eskuadra PNTL Vera-Cruz,  informa  hikas ba GMN hodi hateten, kauza  husi kazu  ne´e tanba hemu tua lanu tiha depois joven  nain lima ne´e dun kapaseti lakon hodi husu ba membru Polísia Militar.

“Ami iha  tempu  ne´e  hemu  iha Motael, ami  mós  ho grupu  ida, maibe  grupu sira  ne´e sivil,  ne´ebe sira mai  hamutuk  ho ami hemu hamutuk   ne´ebé  involve  Polísia Militar ho  tan  Polísia ida maibe ami la deskobre Polisia Militar, ne´ebé sira mai enjoy  ho ami, se  sira tua laiha ami fó tua ba sira,“esplika Remigio  De Carvalho, juventude Maskanrinhas, ba  jornalista sira, iha Kuartel PNTL Díli, Segunda (08/01/18).

Nia haktuir,  tan de´it  kapaseti  ne´e mak  halo soldadu Polisia  nervozu.“Entaun imi hanoin katak ami naok ten ka,  ne´e mak maun sivil bolu maun Polisia Militar ne´e toba hela  hodi mai koalia. ne´ebé ha´u-nia  primu PNTL  ne´e mak ba, depois koalia hela langsung maun Polísia Militar lori kapaseti baku langsung membru PNTL ne´e, ne´ebé maun PNTL ne´e hasai nia kartaun  dehan ha´u Polisia depois hodi baku malu. Ami baku maun Polisia Militar ne´e hanoain katak nia sivil,“dehan Remigio  De Carvalho.

Enkuantu   familia husi   juventude nain lima,  Monica Soares Fatima senti  la kontente ho atuasaun Polisia Militar  tanba  Polisia Militar ninia atuasaun hanesan kria fali funu kikoan ida iha Maskarinhas.

“Horseik ne´e ami hanoin katak funu kikoan ida  mosu iha Maskarinhas, hotu-hotu halai, sira serkula hodi tama  uma laran, depois ha´u hateten ba sira, ha´u nia  oan iha ha´u hakarak  koopera  ho justisa  atu prosesu lao ba oin,“dehan Monica Soares.

Nia hatutan, Polísia Militar mak iha dever liu kaptura  joven sira ka Polísia Nasionál Timor-Leste (PNTL).

“Ho kapturasaun ne´e ami tuir ba  to’o iha Kuartel Polísia Militar, depois  Polisia Militar sira dehan ami nudar sira nia maun ami hanorin sira depois  mai ami lori ba Polísia iha Caicoli, depois ami tuir ba iha Caicoli haree ba ami nia oan ami la koñese,“dehan Monica Soares, ho matan ben

Alende ne´e, Segundu Komandante PNTL Munisípiu Díli Superintendente Assistente, Euclides Belo, hateten, joven nain lima ne´e submete ona ba  prosesu  investigasaun  no hela de´it membru Polisia Nasional Timor-Leste ida seidauk hato´o ninia deklarasaun inklui membru Polisia Militar tanba sei hala’o hela  tratamentu iha hospital.

“Vítima ne´ebé halo  tratamentu iha hospital ne´e  grave. Husi  sofrementu ne´e  ita identifika suspeitu nain 5  ne´ebé mak ohin mai, sira komparasi  prosesu hotu falta  mós membru PNTL   nain ida membru  ne´e kolokasaun iha Ermera, espera  katak  prosesu hotu sei haruka ba Ministériu Públiku,“dehan Euclides Belo.

Relasiona  ho kazu ne´e wainhira GMN tenta  konfirma ho Komandante Unidade Polisia Militar, Major Abel da Costa Xavier alias ‘Niki’ iha Kuartel Polisia Militar Quintal Boot, maibe Komandante  ne´e la fó esplikasaun, tanba la hetan autorizasaun husi Xefe Estadu Maior Falintil Forsa Defeza Timor-Leste.avi