Filomeno Paixão husu membru F-FDTL labele mete partidu

Vise Xefe Estadu Maior FALINTIL Forsa Defeza Timor-Leste (F-FDTL), Brigadeiro  Filomeno Paixão,  husu ba membru F-FDTL labele mete iha atividade partidu, no kuda nafatin neutralidade  no imparsialidade.

`´Kuda neutra imparsial labele mete tun mete sa’e iha partidu sira-nia aktividade,  komisiu koalia no seluk tan,“esplika Vise  Xefe Estadu Maior FALINTIL Forsa Defesa Timor-Leste (F-FDTL), Brigadeiro,  Filomeno Paixão, liu husi diskursu  aniversariu Unidade Polísia Militar, ba dala 13  hala´o  Sesta (19/01/18), iha Kintal Bo’ot Díli.

Tanba  ne´e, nia husu ba membru F-FDTL hala´o servisu kumpri konstuisaun no dekretu lei sira ne´ebé mak  iha.

“Komunidade iha momentu  sira ne´e hateke  hela ita, tanba ita mak sira-nia últimu esperansa,“dehanFilomeno Paixão.

Entretantu Unidade Polísia Militar harii  iha Loron 17  Fulan Janeiru  Tinan  2005    Kompleta ona ninia ezistensia ba dala 13,  ho  efetivu hamutuk 33 , ne´ebé komanda  husi  matebian Alfredo Reinaldo, maibe oras nee dadauk Polísia Militar  komanda husi  Major Abel da Costa Xavier ho nia  efetivu hamutuk 163.

Partisipa iha seremonia ne´e,  mak Vise  Xefe Estadu Maior FALINTIL Forsa Defeza Timor-Leste (F-FDTL), Brigadeiro Filomeno Paixão, asesor  internasional  no família husi  F-FDTL, maibe Xefe Estadu Maior F-FDTL Major Jeneral Lere Anan Timur la partisipa.avi