Impase polítika impede lei autoridade marítima

Ministru Defeza no Seguransa (MDS), José Agostinho Sequeira ‘Somotxo’, konsidera situasaun aktual fó oportunidade ba sira atu halo lejislasaun ka lei autoridade marítima, atu nune’e bele fasilita servisu FALINTIL-Forsa Defeza Timor-Leste (F-FDTL), liu-liu Komponente Naval.

“Autoridade marítima ne’e hanesan problema ida que importante ba nasaun ida ne’e, maibé imi hotu hatene katak ami atu halo lei ruma presiza liu husi Parlamentu Nasional, agora situasaun polítika aktual la fó oportunidade ka la fó tempu para ami bele halo lejislasaun ruma ba defisiensia sira ne’ebé iha ita-nia rai,” Ministru Defeza no Seguransa (MDS), José Agostinho Sequeira ‘Somotxo’ ba jornalista sira hafoin remata enkontru semanal ho Prezidente Repúblika, Francisco Guterres ‘Lú Olo’, iha Palasiu Prezidensial, Bairo Píte, Díli, Tersa (16-01-2018).

Ministru Defeza no Seguransa (MDS), José Agostinho Sequeira ‘Somotxo’ informa lia hirak ne’e relasiona iha serimonia aniversariu Komponente Naval F-FDTL ba Dala 12 iha iha Baze Naval Hera ne’e, Komandante Komponente Naval Ligeiras Kapitaun Fragata Adão Brito ‘Zeky’, Liu husi ninia diskursu husu atu Estadu defini Marítima nasional no Legaliza lei orgánika ba Komponente Naval ninian.

Tanba tuir Komandante Komponente Naval liu husi lei autoridade marítima bele fasilita komando Komponente Naval iha misaun operasional.

Entretantu Xefi Estadu Maior F-FDTL, Major Jeneral Lere Anan Timur rekoñese lei balun seidauk iha, maibe espera katak Governu no Parlamentu Nasional sei prepara lei ba autoridade marítima ninian.

Antes ne’e mos PR husu ba Governu atu estabelese lei ba autoridade marítima, tanba to’o agora seidauk iha lei ba autoridade marítima ninian.ves