Kampaña EA, Lere husu lider parpol ‘sukat ibun’

Xefe Estadu Maior F-FDTL, Major Jeneral Lere Anan Timur, husu lider partidu polítiku (parpol)sira atu sai edukadu, bainhira hato´o programa iha kampaña ba Eleisaun Antesipada (EA).

Lere dehan,  “agora la hatene  polítiku sira-nia kampaña  atu koalia saida,  programa hotu sira koalia tiha ona keta halo ba sira trata malu dehan naok ten karik, ida ne´e dala ruma bele soran.”

“Ami apela ba lider sira, liu-liu politiku sira atu sai ema edukadu, ema ne´ebé mak ho maturidade, ema ne´ebé mak matenek para mundu  bele foti ita-nia naran`,`esplika esplika Xefe Estadu Maior F-FDTL, Major Jeneral Lere Anan Timur,ba jornalista sira Segunda (29/01/18) hafoin enkontru ho komandante Jeral PNTL Komisariu Julio Hornay ho ofisias no superior F-FDTL iha Kuartel F-FDTL Fatuhada Díli.

Lere afirma, kuandu eventu eleisaun antesipada mak la’o susesu, signifika Timor orgulhu onra boot iha mundu rai klaran, sai ezemplu ba mundu tomak.

“Ita konfia  ita-nia lider sira mesak Timor-oan, konfia mós povu ne´ebé mak maduru sei laiha problema. Eleisaun antesipada mai se mak manan, manan ona, se mak lakon, lakon ona, maibe  ita hotu hamutuk servi nafatin ita-nia rai,“dehan Lere Anan Timur.

Relasiona ho eleisaun antesipada  ne´ebé mak sei hala´o, Komando FALINTIL Forsa Defeza Timor-Leste (F-FDTL) no Polísia Nasionál  Timor-Leste (PNTL), Segunda  (29/01/18) hala´o enkontru hodi prepara seguransa ba eleisaun antesipada iha Kuartel Jeneral F-FDTL Fatuhada Díli.

Alende ne´e  iha enkontru ne´e partisipa husi  Komandante Komponente  no unidade no komandante muníspiu 12  inklui Komandante PNTL Rejiaun Administrativa Espesial Oecussi Ambeno (RAEOA).

`´Objetivu enkontru Komando rua F-FDTL no PNTL ne´e  nian hodi haloa  preparativus ba seguransa eleisaun antesipada nian,“esplika  Lere Anan Timur.

Lere dehan, depois 60 dias  Prezidente Repúblika sei anunsia data ba eleisaun antesipada.

“Tanba  ne´e mak ami bolu Komandante Komponente  no unidade no komandante muníspiu sira mai hodi  fó hanoin  hodi responde dezafiu boot ne´ebé agora mosu iha ita nia oin,“dehan Lere.

Atu garante seguransa ba eleisaun antesipada ne´e, Lere Anan Timur sei la eziji kona-ba fasilidade.

“Problema  kona-ba fasilidade ha´u d ehan buat  ne´ebé mak  ita iha ita uza ida ne´e  ita labele ejizi buat  ne´ebé mak  liu  ita nia kapasidade  atu atende ba militar sira,“dehan Lere.

Kuandu  militar sira hetan  moras hanesan ai tohar ka liman mak tohar labele servisu.  Mas operasional  labele eziji kondisoins hanesan fasilidade kareta  no hahan.

“Mas  ha´u  hanoin katak, nasaun  ita nian Timor oan mak PNTL, Timor oan mak F-FDTL, hanesan  mós ha´u hateten ba sira imi labele koloka imi nia a´an  hanesan forsa manutensaun paz iha mundu internasionál, maibe imi hanesan forsa luta iha imi-nia nasaun, imi labele limita buat balun ne´ebé mak imi fó,“dehan Lere Anan Timur.

Tuir konstituisaun RDTL Artigu 40 iha alinea 1. Ema hotu-hotu iha direitu ba liberdade ko’alia nian no direitu atu hetan informasaun ruma, no tan informasaun loloos nian;  2. Liberdade ko’alia no informasaun ninian labele hetan limitasaun hosi sensura ruma;  3. Lei maka sei regula direitu no liberdade ne’ebé temi-sai iha artigu ida-ne’e, ho baze iha imperativu kona-ba respeitu ba Lei-Inan no respeitu ba ema idaidak nia dignidade.

To’o oras ne’e dadauk Prezidente Repúblika, Francisco Guterres ‘Lu-Olo’ seidauk anunsia data kona ba EA ne’e rasik, maibe iha tempu badak públiku sei hatene.

Antes ne’e, Prezidente Repúblika, Francisco Guterres ‘Lú-Olo’, anunsia  dissolve Parlamentu Nasionál, iha loron 26 fulan Janeiru ne’e, hodi hakotu impase polítika entre partidu governasaun no opozisaun.avi