Kazu tiru mate Tiago, Família seidauk simu rezultadu husi MP

Prosesu kazu matebian, Tiago Inacio  Coelho, ne´ebé deskonfia tiru  husi  ajenti Polísia Nasionál Timor-Leste (PNTL), iha Bebonuk fulan Maiu 2017, to´o agora tama ona ba  Janeiru 2018, kompleta   fulan 8, maibe parte família seidauk simu informasaun pozitivu ruma  husi Ministériu Públiku (MP).

”To´o agora ami seidauk  rona rezulatadu   kona-ba prosesu   investigasaun ruma  husi  MP. Ami- nia alin  ne´e mate la  ho sala,  nia la´os kaer rama ambon mak mate. Ne´ebé ami  husi família matebain Tiago nian eziji ba MP  no  ba Parlamentu Nasionál, bele haree lalais ba ha´u-nia alin  ne´ebé mak mate, nia mate  labele saugai de´it hanesan ne´e ,“esplika família  matebian Adelina Bisoi Coelho, ba GMN, Tersa (16/01/18), iha Aldeia Metin 4, Suku Bebonuk, Postu Administrativu, Dom Alexio,  Munísipiu Díli.

Adelina dehan,   ajenti  PNTL  ne´ebé mak tiru mate  nia alin  ne´e mós too agora, parte família  seidauk hatene kaptura  ona ka seidauk.

“Izame balistiku kona-ba kartus musan to’o agora  mós ami seidauk rona. Ami eijzi ba nai   nai ulun sira tau matan  netik  ba ami  povu ba,“dehan Adelina.

Relasiona  ho kazu   ne´e,   GMN tenta  halo  konfirmasaun ho  responsavel maximu servisu Polícia Cientifika Investigação Criminal (PCIC),  maibe Diretor laiha tempu  tanba okupadu  ho servisu balun ne´ebé mak presiza atu hala´o.

Enkuantu, kazu  ne´e akontese iha Sabadu (06/05/17), mais ou menus tuku 08:00 kalan  oras Timor-Leste.

Iha  parte segundu Komandante Jeral PNTL Komisariu Faustino da Costa hateten, la´os deskonfia membru PNTL tiru mate joven ne´e mak prosesu kleur.

“Ami mós hein hela notifikasaun husi Prokurador. Atu dehan de´it katak, la´os deskonfia involve membru PNTL mak hodi dada kazu ne´e kleur, ha´u hanoin ida ne´e lalos,“responde Faustino da Costa.avi