Laiha akordu extradisaun, Susar lori Tiago-Chan Fong mai TL

Governu atu lori fila Tiago Guerra ho nia fen Chan Fong Fong  fila mai Timor-Leste (TL) difisil, tanba Estadu Timor-Leste laiha akordu extradisaun ho  Estadu Portugal.

“Ita laiha akordu extradisaun ho Portugal,  ita  presiza  rona fali ho sira, husi  parte Tribunal ninian  ita-nia Ministériu Justisa rasik  mós halo komunikasaun  no  oras  ne´e dadauk halo  kontaktu entre autoridade  justisa  Portugal  nian  buka oinsa mak rezolve asuntu  ne´e halo didiak,“esplika Ministru Negosius Estranjeirus Kooperasaun (MNEK), Aurelio Guterres, ba   jornalista sira, Domingu (07/01/2018), hafoin partisipa  iha seremonia natal  konjunta entre Igreja ho Governu iha salaun igreja Katedral Díli.

Aurelio dehan,   kazu Tiago Guerra ho Chan Fong Fong sai  hanesan lisaun ba  Timor-Leste.

“Agora  ita-nia servisu  oinsa  mak  ita-nia sistema  halo akordu  ho Portugal no Australia  ho nasaun sira  seluk  ne´ebé mak    bele  iha posibilidade  ema  estranjeiru sira servisu barak  iha  Timor-Leste, wainhira mosu buat ruma bele rezolve iha nasaun Timor deít. Ho esperiensia ida  ne´e mak  ita la rezolve aban bairua la  rezolve bele kontinua repete hanesan foin akotese ba ne´e,“dehan Aurelio Guterres.

Antes ne’e Arguidu Tiago Guerra no arguida Chan Fong Fong  halai ba Portugal,   maibe  Polísia Nasionál  Timor-Leste (PNTL) liu husi Servisu Investigasaun Kriminal (SIK) Sesta (08/12/2017) mais ou menus tuku 04 lorokraik ezekuta mandadu Ministériu Públiku halo buska hodi  kaptura ba autor kompañia    ro  nain ne´ebé mak   tula Tiago Luis  Guerra   ho Fong Fong ba Darwin Australia.

Husi  buska  SIK nian ne´e kaptura  suspeitu  nain tolu,  mak hanesan  Natalino  Evangeslista da Silva Faria  nuudar   Diretor Corais Timor hanesan ro nain,  sidadaun  Timorense Portuguesa.  No Malaquias  Tefer  da Silva Faria, hanesan    kapitaun ro  sidadaun  Timorense Portuguesa nomós  Davide  Damião  Justino, hanesan kapitaun ro sidadaun Portugues.

Sidadaun sira ne´e  involve   iha krimi  favorestimentu  pesoal no  falsifikasaun   dokumentu  públiku. Nuc 0194/17.PNSIK.

Alende    ne´e,   iha loron  16  fulan  Novembru  2017, suspeitu  Davide  Damião  Justino   ho Malaquias Tefer da Silva  Faria dada  ro   ho kareta   ne´ebé mak Davide Damião Justino  nian ho numeru matrikula  17-282 Timor-Leste ho modelu pic up  husi Díli  ba Same   Betano.

Iha loron  17 fulan Novembru  2017, entrega   Ro  iha tasi  ibun Betano,  Same,  ba arguido Tiago  Luis Guerra   ho Fong Fong   Guera  hodi halai  ba Darwin Australia.

Iha rezidensia Natalino  Evangeslista da Silva Faria  no Malaquias Tefer da Silva  Faria  nian iha  Manleuna, Polisia konsege  rekolha   osan no  prende   pasaporte tanba sidadaun  nain rua ne´e kaer pasaporte rua, Timorense no Portuguesa no evidensia seluk tan.

Hafoin halo buska,  SIK lori suspeitu   nain tolu  ne´e ba submete ba prosesu investigasaun iha SIK Kuartel Jeral PNTL  hodi detein oras 72 iha sela Polísia  depois submete ba  primeiru  interogatoriu.

Entretantu Tiago Guerra no Chan Fong Fong  halai ba Autralia, hafoin simu  kondenasaun pekulatu husi Tribunal Distrital Díli to’o  iha Lisboa Portugal 25 Novembru 2017.

Iha  fulan Agostu Juis 2017, Juis pekulatu kondena prijaun tinan 8 no multa $ 859.000 tanba komete kazu pekulatu, brankamentu no kapital no falsifikasaun dokumentus no tranferensia osan $859 ne´ebé halo  iha tinan 2011 bazeia ba konsultor  norte Amerikano Boby Boye.Avi