Prokurador nain hitu seidauk ativa servisu

Tribunal de Recurso indefere (la hatan) rekursu reforma rekerementu husi Conselho Superior Ministeriu Publiku, ne’ebe la simu desizaun tribunal de recurso anula desizaun conselho superior ba suspensaun prokurador nain hitu, iha Prokurador Distrital Dili.

Mesmu prokurador nain hitu manan ona husi sira nia kazu, maibe to’o agora seidauk fila ba sira nia servisu fatin.

Defeza prokurador nain hitu, José Guterres hatete nia hetan ona notifikasaun husi TR kona ba desizaun TR la simu rekursu reforma rekerementu husi CSMP ne’e.

No konaba ninia kliente sira ne’ebe seidauk ativa servisu, nia konsidera hanesan kestaun seriu ida, nia tenki trata, nune’e nia kliente sira bele servisu fila fali.

 “Mais lolos ne’e sira tenki tama ona servisu, kuandu CSMP mak la dehan buat ida ami sei husu, tanba hakarak ka lakohi sira tenki fila fali hanesan uluk servisu hanesan no simu sira nia salariu,’’ dehan José ba jornalista sira via telefone, Kuarta (24/01).

Prosesu ho numeru 21/contensioso/2017/TR ne’e fo sai iha loron 5 fulan Janeiru 2018 no TR notifika kedas parte defeza ho CSMP iha loron 17 fulan Janeiru ne’e ho juiz relator Deolindo dos Santos, Maria Natercia ho Guilhermino da Silva.

Prokurador nain hitu ne’e hetan suspensaun husi CSMP, tanba sira halo petisaun hasoru Prokurador Geral da Republika, José Ximenes, nune’e prokurador nain hotu ne’e la simu desizaun ne’e hodi halo rekursu ba TR liu husi sira nia defeza.

Iha loron 20 fulan Dezembru 2017, TR hola desizaun anula CSMP nia desizaun ne’ebe halo suspensaun ba prokurador nain hitu ne’e. nia