Somotxo: Laiha kilat ilegal iha sivil nia liman ■ Difisil identifika kilat lakon

Ministru Defeza no Seguransa (MDS), José Agostinho Sequeira ‘Somotxo’ deklara, iha nasaun Timor-Leste laiha kilat ilegal, tanba hafoin MDS hasa’i apelu sirkular hodi husu sidadaun ne’ebé kaer kilat ilegal entrega kilat ilegal, laiha ema ida maka entrega.

“Dala ida tan ha’u hateten ba públiku, tanba advezes públiku balun la akompaña situasaun, maibé fulan ida tomak (Dezembru 2017-red) husi dia 1 to’o 31 Dezembru 2017 apelu sirkular ne’e la’o to’o ohin loron, ita la haree ninia rezultadu, ne’e signifika katak iha Timor-Leste laiha kilat ilegal iha ema sivil ninia liman,” MDS Somotxo ba jornalista sira hafoin remata enkontru semanal ho Prezidente Repúblika, Francisco Guterres ‘Lú Olo’, iha Palasiu Prezidensial, Bairo Píte, Díli, Tersa (16-01-2018).

Nia esplika katak, maibé medidas no prevensaun ne’e MDS kontinua halo nafatin, hodi kontrola situasaun iha rai laran.

“To’o ohin loron ema sivil ruma seidauk mai entrega kilat ba MDS no ba PNTL no F-FDTL dehan sira iha kilat, signifika katak iha situasaun rua (2) ne’ebé it abele haree, ida maka Timor-Leste ne’e laiha kilat iha ema sivil nia liman, ida fali maka hanesan informasaun ne’ebé maka ita rona para atu toma medidas ne’e bosok hotu, ne’ebé iha hela ho situasaun ida ne’e, maibé sé tuir militar abanbainrua imi mós sei haree situasaun balun que bele mosu iha ita nia rai,” dehan José Agostinho Sequeira ‘Somotxo’.

Nia esplika katak, tuir investigasaun akontesimentu iha Manleuana, iha loron 31 Dezembru 2017 ne’e kilat musan fura husi uma kakuluk no ba kazu sira seluk ne’e prosesu investigasaun sei la’o hela para atu hatene loloos kilat musan ne’e mai husi ne’ebé.

“Buat hotu liu ona, ita hotu hatene katak momentu prevensaun para atu labele soe paison ou fogo de artifício sunu arbiru de’it, tanba ne’e inseguransa boot ba ita hotu ne’e maka iha nasaun sira seluk ne’e kontroladu, sé sunu arbiru de’it ne’e konserteza que iha ita nia rai ne’e kilat ilegal iha, konserteza que ema aproveita bele oho ita,” haktuir MDS ne’e.

 Maske nune’e, Antes ne´e, Ministru Defeza no Seguransa, José Agustinho Sequeira `Somotxo` hateten, kilat PNTL nian ne´ebé mak lakon iha tempu krizi hamutuk 10 resin.

“Kilat  iha 10 resin mak sei lakon. Tan ida  ne´e mak ha´u halo apelu keta  iha sivil nia liman karik intrega to´o dia 31 Dezembru,“esplika MDS, José Agustinho Sequeira `Somotxo`.

 Entretantu tuir konstituisaun RDTL artigu   146 alinea 1 to’o 3 no artigu 147 alinea 1 to’o 3, hateten só instituisaun F-FDTL no PNTL deit maka bele uza kilat atu fo garantia soberania nasaun.

Difisil identifika kilat lakon

Komando Jeral Polísia Nasionál Timor-Leste (PNTL), rekoñese kilat PNTL, ne´ebé lakon iha tempu krizi, difisil hetan, se wainhira la hetan ko´operasaun informasaun husi komunidade.

``Ita  nia situasaun mak ne´e  presiza  kooperasaun parte  hotu, mas  Polísia buka mesak nein  ema ruma fó informasaun ida  ne´e la´os buat ida fasil,“ita  bele  lori Polísia barak,  ita kria  ajenti informador barak, mas  laiha kooperasaun ne´ebé diak ne´e difikulta  mós,“esplika Segundu Komandante  Jeral  PNTL, Komisariu Faustino Da Costa, ba GMN, Tersa (16/01/18), iha Kuartel Jeral PNTL Díli.

Nia  dehan,  Timor-Leste  ne´e  kolot.  Tanba  ne´e liga ba  kazu  sidadaun estranzeiru  fujetivu  balun  fila  ona ba  prijaun.

“Atu dehan   hanesan ne´e  so tempu  mak orsida  bele  responde  bainhira  mak   ita  hetan fila-fali. Mas  importante  mak se mak rai  kilat sira  ne´e  to´o loron  ruma nia simu  mós konsekuensia  responsabilidade,”dehan nia.

Faustino da Costa hateten,   presiza  kooperasaun  informasaun husi komunidade sira. “Se  ema  hotu iha  vontade  atu informa no haree iha fatin ruma ka rai uma Polísia bele halo indentifikasaun.”dehan nia.

wainhira  husu, diskonfia kilat sira ne´e  iha ema  importante balun mak rai hela?  responde ba  pergunta  ne´e, Faustino da Costa, tuir  informasaun hanesan ne´e.

“Mas  atu dehan  hanesan ne´e kuandu  ita temi alta entidades  ne´e atu dehan  ne´e laiha, keta  pesoal ruma, kuandu   ita koalia kona-ba eis  alta entidade laiha,“dehan Faustino Da Costa.

Antes ne´e, Ministru Defeza no Seguransa José Agustinho Sequeira `Somotxo` hateten, kilat PNTL nian ne´ebé mak lakon iha tempu krizi hamutuk 10 resin.

“Kilat  iha 10 resin mak sei lakon. Tan ida  ne´e mak ha´u halo apelu keta  iha sivil nia liman karik intrega to´o dia 31 Dezembru,“esplika MDS José Agustinho Sequeira `Somotxo`.

Maibe  tuir Segundu Komandante Jeral  PNTL Komisariu Faustino da Costa, hateten, kilat total kilat PNTL  ne´ebé mak lakon iha tempu  krizi 2006, hamutuk kilat hamutuk 7, kompostu husi kilat bo´ot 3  no Pistola Glock  4, ne´ebé mak lakonsege fila  to´o ohin loron.ves/avi