Aniversariu F-FDTL ba dala 17, Lere: Ita tenki investe nafatin ba futuru

Xefe Estadu Maior FALINTIL Forsa Defeza Timor-Leste (F-FDTL)  Major General Lere Anan Timur,  durante ezistensia F-FDTL iha tinan 17 hasoru buat diak no a´at, tanba ne´e tenki investe nafatin ba futuru.

“Ita nia forsa defeza ho tinan 17 de ejestinsia  iha esperensia diak nomós iha esperensia a´at, ne´ebé diak  ita hametin no dezenvolve ba diak liu tan,  husi ne´ebé a´at  ita foti lisaun moris lao ba oin nafatin,  ita tenki investe nafatin ba futuru  ho kbiit no enerjia tomak,“esplika Lere Anan Timur, liu husi diskursu aniversariu  loron transformasaun FALINTIL ba F-FDTL, ne´ebé mak halo Sesta (02/02/18), iha Kuartel Jeneral Fatuhada Díli.

Lere relembra katak, tinan 2000 iha Aileu atu forma forsa defeza  Timor-Leste  iha  polimika boot,  tanba iha balun  dehan atu harii forsa  armada ida iha Timor, maibe  balun dehan la presiza forsa armada ba Timor-Leste.

Ekipa King Cooling  ne´ebé mai estudu se  iha nesesida iha forsa defeza  ida iha TL ka lae, maibe sira nia hanoin no hakarak  atu  transforma Forsa Livertasaun Nasionál Timor-Leste (FALINTIL), ba forsa Polisial

“Maibe  ho brani ho determinasaun husi Komandante Em Xefe ho mós Komandante Jeneral Taur Matan Ruak hamutuk ho Veteranus sira transforma duni FALINTIL ba ka Forsa Armadas de Livertasaun  Timor-Leste ba forsa Defesa Timor-Leste,“dehan Lere Anan Timur.

Depois iha tinan 2001   transformasaun FALINTIL ba F-FDTL maibe la temi  kona-ba Komponente Naval no  forsa aero hanesan  mehi ida ba Governu Estadu Timor-Leste, maibe Governu Portugues  oferese ro rua atu hahú harii  forsa Naval iha Hera.

“Ami agradese ba Portugal tanba tulun fó aranke  ba Komponente  Naval hahú. Komponente Aero hanesan mehi ida, ba  ita nia Governu no Estadu,“dehan Lere Anan Timur.

No iha tinan  2016, F-FDTL hahú forma nukleu kiik  forsa espesial bolu naran unidade FALINTIL nian, sira nia estatutu  propriu ba sira nia misaun

“Ita haruka tiha ofisiais no sarjentu  unidade ida ne´e ba Portugal tinan  ida ne´e ita haruka tan nain hat, mais soldadu nain 10 atu tuir treinu avansadu forsa espesial nian iha Lamengo Portugal,“dehan Lere Anan Timur.

Lere realsa katak,  tinan 2018  sai realidade estudante  ne´ebé mak remata  ona kursu pilotu iha Filipina.

 “Hahú halo sira nia spesialidade ho apoiu Kompanha  privadu Aero Díli ita  aviaun ida ba treinu no patrulhamentu iha lalehan,“dehan Lere Anan Timur.

Hola parte iha seremonia mak, Prezidente Repúblika Francisco Guterres Lú-Olo,  Primeiru Ministru Mari Alkatiri, no membru Governu VII Governu Konstituisional, Eis  Jeneral Tentara Nasional Indonesia (TNI),  Gatot  Nurmantyo, no     Brigadeiro   Jeneral   Matthew Pearse, Komandante Jeral PNTL Komisariu Julio Hornay, Veteranus  ho seluk tan.

Hafoin selebra tiha loron transformasaun FALINTIL ba F-FDTL,   ba 17 ne´e, bainaka sira ba haree livru istoria FALINTIL nian iha sala enkontru Kuartel  Jeneral Fatihada Díli.

Remata tiha kovidadu sira selebra loron moris Lere Anan Timur.

Lere  moris  iha Postu Administrativu  Iliomar Munísipiu  Lautem, loron  2  fulan Fevereiro tinan 1952.  Tanba  ne´e  iha selebrasaun aniversariu loron  transformasaun FALINTIL ba F-FDTL ne´e, Xefe Estadu Maior Jeneral  Lere Anan Timur  hala´o mós tinan ba dala  66 .avi