Falta fasilidades la impede serbisu PNTL Bobonaro

Maske fasilidades atu asegura serbisu operasional Polisia Nacional Timor Leste (PNTL) Munisipiu Bobonaro nian minimu, maibe la sai obstraklu ba polisia nia serbisu iha area juridiku Bobonaro nian. 

Komandante PNTL, Municipiu Bobonaro, Superentendenti Xefi, Armando Monteiro, hateten, fasilidades operasional PNTL Bobonaro nian sei minimu, maibe la difikulta serbisu PNTL nian atu garante seguransa iha Munisipiu Bobonaro.

“Fasilidade iha PNTL menus tebes, maske rekursus ekipamentus menus, maibe la’os sai hanesan fator impedementu ida ba ami nia seguransa hodi hala’o kna’ar, tanba kna’ar ida ne’e la’os primeiru vez maibe ami hala’o bebeik ona, entaun iha ka laiha, hanesan autoridade seguransa ba rai ida ne’e, kualker oras preparadu hodi assegura ba prosesu tomak,” hateten Superentendenti Xefi, Armando Monteiro ba GMN iha Komando PNTL Munisipiu Bobonaro iha Maliana, Segunda (19/02/2018).

Komandante PNTL Municipiu Bobonaro ne’e mos dehan, dadaun ne’e Komando PNTL Bobonaro preparadu ona hodi fo segurança ba aktividade Governu nian, especialmente iha Eleisaun Antisipada ne’ebe sei akontese iha loron 12 Maio tinan ne’e.

“Preparasaun komando PNTL Municipiu Bobonaro ba eleisaun antisipada, liu husi reuniaun ne’ebe maka foin lalais hala’o iha komando PNTL, ne’ebe ami simu ona orientasaun, ami prepara ona planu operasaun, husi planu ne’e ami determina ona rekursu hira maka sei involve iha segurança eleisaun antesipada”, dehan Armando Monteiro.

Alem ba seguransa Eleisaun Antesipada, komando Bobonaro ho nia membru nain 156 mos halo ona operasaun intelegensia nian ne’ebe dadaun ne’e la’o hela hodi kolekta kuaker informasoens iha áreas juridiku Bobonaro. mia