Hasoru Eleisaun Antesipada, Lere husu forsa armada mantein neutralidade

Xefe Estadu Maior FALINTIL Forsa Defeza Timor-Leste (F-FDTL)  Major Jeneral Lere Anan Timur, husu ba forsa armada  hotu atu mantein neutralidade hodi fó seguransa ba eleisaun antesipada.

“Ita hotu hatene katak,  ita sei halao  eleisaun antesipada, situasaun ne´ebéque dezafia ba forsa armada ninia kapasidade.Tanba ne´e husu ba forsa ba imi ha´u nudar imi ninia komandante forsa armada nian, husu tenki mantein ninia neutralidade nudar liman kroat povu nian,“esplika Lere Anan Timur, liu husi diskursu aniversariu  loron transformasaun FALINTIL ba F-FDTL, ne´ebé mak halo Sesta (02/02/18), iha Kuartel Jeneral Fatuhada Díli.

Lere dehan,  iha tinan 1987, Komandante Em Xefe Kay Rala Xanana Gusmão hatoo mensazen ba FALINTIL atu sai husi FRETILIN.

“Komandante balun ohin loron la hamutuk ona  ita, balun sei iha ne´e, ho mensazen ida ne´e balun reazen, balun la kontente, maibe tanba intrese nasaun ne´e  nian ema hotu hakruk ba desizaun Komandante em Xefe iha tempu  ne´eba,“dehan Lere.

 Situasaun ida ne´ebé que difisil  atu toma desizaun iha iha momentu ne´eba, maibe tenki toma tanba intrese nasaun ou intrese povu nian.

“No nia implementasaun halao iha tinan 1988 FALINTIL ses duni husi FRETILIN. Nune`e mós Komandante Em Xefe ses husi FRETILIN atu bele halibur nasionalista hotu ne´ebé hakarak independensia ba Timor-Leste. Tanba  ne´e ohin loron ita tuir kultura ida ne´e,“dehan Lere.

Forsa armadas laiha partidu, ka apartidariu nafatin hodi sai lolos lutu ba nasaun ho nia misaun ba defeza externa,  defeza konstituisaun no defeza ba povu nia intrese sai liman kroat lolos ba povu, ne´e la signifika, forsa armada matan delek ka sai analfavetu.

“Forsa armada tenki hatene saida mak politika, hatene saida mak los, saida mak lalos, atu nune´e  ema labele fasilmente manobra let de´it forsa armada ba ninia intrese politiku,“ Lere koalia lia hirak ne´e hodi fó izemplu ba krizi iha Guine Bisau  ninian,  maske ukun a´an tinan 40  resin ona, maibe  situasaun problema hela de´it.avi