Materia prima ANP perigu ba TL

Materia prima  ho naran Ammonium Nitrate Phosphate (ANP), ne’ebe mak Polícia Científica  Investigação Criminal (PCIC) prende iha porto Dili, foin lalais ne’e, bele fo  ameasa bo’ot Timor Leste (TL)  tanba material prima ne’e  bele produs ba bomba ho skalaun bo’ot.

Ekipa Explosive Ordnance Disposal (EOD) nudar ramu husi Unidade Espesial Polísia  konsidera materia prima ANP ne’e sensitivu no prigozu,  tanba wa’inhira kahur ho material seluk bele sai  bomba.

Komandante Unidade Espesial Polísia (UEP), Superentendente Xefi Polisia Afonso dos Santos, fo sasin katak,  materia prima ANP ne’e bele uza ba nesesidades agrikula, maibe ida ne’e fo ameasa bo’ot ida TL. Pior liu tan, sasan sensetivu sira ne’e hatama la liu husi dokumentus propriu ne’ebe hetan legalizasdaun husi insituisaun Estadu nian.

Ba GMN iha kampaun UEP, Bairo Pite, Dili, Tersa (27/2/2018), Komandante  Afonso dos Santos, aprofunda katak, materia prima ANP ne´e mesak la bele tama deit iha teritoriu laran, tanba ne’e, presija atensaun PNTL hodi kontrola masimu ba kompaña sira ne’ebe hatama sasan ne’e.

Komandante UEP lamenta katak labele hakfodak wainhira sasan sira tma tiha ona iha Portu e presiza koñesimentu husi autoridade Alfandega sira bele dehan deskontrola tiha ona, tanba materia prima ne’e kilograma 1 ka 2 sai ba liur fo perigu bele sai bomba.

Komandante ne´e dehan, materia prima ne´e bele uza  ba aktividade agrikultura hanesan audubus, maibe  perigozu  mós kuandu materia  ne´e kahur hamutuk ho produtu seluk ne’ebe sensitivu tebes fo sai publiku.

Materia prima ANP ne´ebé mak PCIC prende iha loron Segunda (26/02/2018) mak marka Ammonium Nitrate Phosphate ho toneladas  50, iha kontentor 2,  ne´ebé importa husi China mai Timor Leste. Alende ne´e, PCIC  detein ema  nain hat ho borgol iha Portu Díli lori ba iha edifisiu PCIC, Caikoli-Díli, hodi submete ba  prosesu investigasaun.

Sidadaun nain hat  ne´e mak  LM no NS  Timor oan,  DW sidadaun Indonesia  no KY manajer kompaña Kelong Passific ne´ebé mak nia armazen iha  Aimutin.

Jornalista  GMN tenta  konfirma ho Adjuntu Direktur PCIC maibe la konsege, tanba okupadu hela servisu no husu ba GMN atu hein kontaktu mak deit. eus