Material prima deskonfia droga, MP desidi teste iha Indonesia

Ministériu Públiku (MP), desidi  tiha ona atu ba teste sampel material prima ne’ebé deskonfia  droga iha  laboratóriu Badan Nasional Narkotika (BNN) Indonesia.

`´Prokurador  desidi tiha ona  hodi halo teste laboratóriu, surat  ne´e iha ona depois ami trata para teste  laboratóriu  ne´e  iha Indonesia,“èsplika Komandante Jeral PNTL Komisariu Julio Hornay, ba GMN, Segunda (05/02/18),  hafoin enkontru ho Ministru  Defeza no Seguransa,  José Agustinho Sequeira ‘Somotxo’, iha Ministériu Seguransa Vila-Verde Díli.

Maske  Prokurador Jeral Repúblika  hasai  ona karta  hodi haruka material  prima  deskonfia droga  ne´e  hodi ba halo teste iha Indonesia, maibe seidauk termina lolos  data baninhira  ekipa husi Timor-Leste  atu aranka ba Indonesia, tanba sei hein orsamentu hodi fasilita servisu.

“Ita haruka labarik sira ba presiza orsamentu hodi selu, tanba  ne´e mak  ami trata  hela hodi aselera, kazu  ne´e  urjenti  atu haree, kazu  ne´e importante,“dehan Julio Hornay.

Wainhira Komando PNTL simu ona karta husi Prokurador Jeral Repúblika, desidi halo teste iha Indonesia, ekipa BNN husi POLDA Nusa Tenggara Timur (NTT), fila ona ba  Kupang, Indonesia, hodi  hein teste laboratóriu ba sampel material prima deskonfia droga  ne´e iha Indonesia.

Kontentor 9 iha  aimoruk Paracetamol Caffeine Carisopodrol (PCC) deskonfia material prima atu produs ba droga ne´e, Unidade Polícia Marítima (UPM), prende iha Portu Díli,  Tersa (23/01/18), wainhira sidadaun Indonesia sira hasai sasan hirak ne´e husi kontentor  atu tula ba Ro Berkat Selayang atu lori liu ba Indonesia, depois iha loron Kuarta (24/01/18)  evakua ba iha Kuartel Jeral (KJ) Polísia Nasionál Timor-Leste (PNTL

Alende ne´e, UPM kaptura sidadaun Indonesia nain 10 inklui kapitaun ba Ro ai Berkat Selayang husi Indonesia ne´ebé atu tula sasan husi kontentor 9 atu lori ba Indonesia.

Sidadau Indonesia nain 10 ne´e submete ba prosesu investigasaun iha Servisu Investigasaun Kriminal (SIK), iha Kuartel Jeral PNTL Díli.

Nune´e iha loron  27/01/18, Servisu Investigasaun Kriminal submete  primeiru interogatoriu,  iha Tribunal  Distrital Díli, aplika  Termu Identidade Rezidensia (TIR) no aprezentasaun periódika ba suspeitu nain tolu  ne’ebé hatama kontentor 9 ne’ebé deskonfia ho materia prima droga.

Tribunal aplika medida koasaun TIR ho aprezentasaun periódika ba suspeitu nain tolu ho inisail H, MK no JP, tanba krime tolu ne’ebé Ministériu Públiku akuza la priense kriteria.

Krime Tolu ne’e mak hanesan brankeamentu kapital, asosiasaun kriminozu no kombate tráfiku droga.

Hafoin Tribunal Distrital Díli, desidi tiha TIR ba arguidu sira ne´e, depois iha loron Domingu (28/01/18) ekipa  BNN, husi NTT mai  iha Díli  ho objetivu atu haree sampel ba  material prima deskonfia droga.

Tanba  ne´e iha Segunda (29/01/18) Xefe BNN, Rotendao NTT,  Komisariu  Lino do Rosario Pereira,  ho nia ekipa hasoru malu ho Komandante Jeral PNTL Komisariu Julio Hornay, iha Kuartel Jeral PNTL, hodi koalia ba kazu refere atu halo teste ba sampel material prima ne´e, maibe iha momentu ne´eba hafoin Julio Hornay  enkontru  tiha  ekipa BNN-NTT, Komisariu PNTL ne´e  hato´o kedas ba iha Prokurador Jeral Repúblika Timor-Leste hodi foti desizaun ruma kona-ba prosesu ne’e atu halo teste ba material prima mak deskonfia droga ne´e. avi