PJR preokupa desizaun TR ba kazu Aimoruk Kontainer 9

Prokurador Jeral Repúblika, José da Costa Ximenes, preokupa ho desizaun Tribunal Rekursu (TR) nian neébe fo pena aprezentasaun periodiku ba suspeitu sira konaba kazu hatama Aimoruk tipu PCC hamutuk kontentor sia (9) foin lalais iha Portu Díli.

PJR konsidera, desizaun TR nian ba suspeitu neébe refere ladun favoravel,  tamba suspeitu sira mesak ema estrangeiru ne’ebe laiha rezidensia iha Timor-Leste.

“Kestaun kontentor 9 ne’ebe mak iha servisu entre ministeriu públiku ho PNTL konsege halo aprensaun ba kontentor sira ne’e iha indikasaun forte katak sasan sira ne’e material para atu produs droga  ne’ebe ho risku boot liu husi droga bai-bain. Ita aprezenta ba primeiru interogatoriu, infelismente tribunal fó aprezentasaun periodika, hanesan prokurador jeral no sidadaun ita respeita desizaun ida ne’e, maibe ami nia pozisaun la simu desizaun ida ne’e, ami halo tiha ona rekursu. Ita boot sira bele imajina de’it sidadaun estranjeira ita haruka halo aprezentasaun periodika nia ba hela iha ne’ebe mak nia atu halo aprezentasuan periodika?, PJR José da Costa Ximenes, hatoó kestaun neé hafoin hasoru malu ho Prezidente Repúblika, Francisco Gueterres Lú Olo, iha Palasiu Preziensial Bairo-Pite, Díli, Segunda (12/02/2018).

Nia hateten, mekanismu legal ne’ebé PJR halo mak hatama ona rekursu ba TR iha semana kotuk liubá no sei hein desizaun husi TR.

“Maibe preokupante ida katak, hau la gosta haree kriminozu sira bainhira  halo festa hakuak malu, tanba pór ignoransia ba ita nia papel”, PJR  hatutan.

Nia hateten, ba kazu refere, ekipa ida husi PNTL no PJR agora dadaun iha hela Indonsia em kooparasaun ho autoridade Indonesia halo teste laboratoriu ba material prima hirak ne’e no iha posibilidade sei fó sai nia rezultadu iha semana ne’e.

“Ekipa ida PNTL no PGR ida agora dadauk iha hela Indonésia hado halo teste laboratoriu ba materia prima hirak ne’e ho kooperasaun ne’ebe  ho PNTL ho autoridade Indonesia no semana ida ne’e rezultadu sei bele sai.”nia afirma.

Sidadaun indonesia nain 10  no Timor oan nain tolu neébe envolve iha kazu hatama kontentor 9 nakonu ho aimoruk PCC  dadauk ne’e sei iha sela Prizaun Bekora.

Iha loron  27 fulan Janeiru, servisu investigasaun kriminal submete  primeiru interogatoriu  iha tribunal  distrital díli neébe ikus mai aplika  Termu Identidade Rezidensia (TIR) ba suspeitu sira husi Indonesia no aprezentasaun periodika  ba suspeitu nain tolu  husi Timor Leste. Ías