PR sei hamutuk ho órgaun Estadu moderniza F-FDTL

Prezidente Repúblika (PR) Francisco Guterres Lú Olo, hateten, nu’udar Komandante Supremu instituisaun  F-FDTL sei hamutuk ho órgaun soberanu sira seluk hodi moderniza F-FDTL.

Xefi Estadu ne’e hateten, ho modernizasaun ba F-FDTL, bele haforsa no hasa’e liutan kapasidade F-FDTL nian hanesan forsa ne’ebé bele atua ho susesu iha kualker situasaun.

“Nu’udar Komandante supremu, ha’u sei haree hamutuk nafatin ho órgaun soberanu sira seluk, oinsa hadia no moderniza F-FDTL atu ita bele hetan ita nia objetivu, atu dignifika, haforsa no hasa’e kapasidade F-FDTL atu afirma-an liutan, nu’udar ita nia forsa defeza ne’ebé bele atua ho susesu iha momentu ne’ebé de’it,” Lú Olo esplika.

Lú Olo hatutan tan, maski ohin loron Timor Leste moris ho difikuldade oi-oin hanesan, rekursu humanus, finanseiru no material maibé sei hakbiit nafatin atu hakat liu dezafiu sira ne’e hotu.

“Situasaun ne’ebé ita moris ohin loron ho difikuldades iha rekursu humanus, finanseiru no materiál, labele laran taridu. Ita sei buka hamanas no hakbiit ita nia-an nafatin atu hakat liu dezafiu sira ne’e hotu ho susesu. Nune’e ha’u apela ba imi hotu atu servisu liutan no reforsa bebeik prinsípiu kultura militar nian, nu’udar riin sira ne’ebé tanen instituisaun militar ida ne’ebé forte no importante ba ita nia identidade no unidade nasionál,” Xefi Estadu ne’e hatutan.

Serimonia komemorasaun transformasaun Falintil Ba Forsa Defeza Timor Leste ba dala 17 ne’e hetan partispasaun husi membrus governu, Parlamentu Nasional reprezentante Komandante forsa husi Austrália, Indonézia, Brazil no Komandante PNTL.ías