SFT selebra tinan ba 17, Maunana:Tenki profisionaliza F-FDTL

Sentru Formasaun Treinu (SFT) FALINTIL-Forsa Defeza Timor-Leste (F-FDTL), selebra aniversariu ba dala 17. Seremonia  ne´e hala’o Segunda (19/02/18),  iha SFT Kampo formatura SFT Metinaro.

Liu husi seremonia aniversariu ne´e, reprezente Xefe Estadu Maior Jeneral, Koronel Maunana, husu membru F-FDTL sira tenki  profesionaliza a´an atu aprende nafatin lingua Inglês no Português, tanba  lingua rua ne´e mak importante uza ba aktidade loron ba loron.

`´Agradese Asesor Australia no Português  tanba sira nia esforsu  hodi hanorin  ita-nia forsa sira hodi hatene lingua, maibe  ita tenki kontinua profisionaliza formasaun ba ita-nia forsa sira,“esplika Koronel Maunana, liu  husi diskursu iha kampu formatura F-FDTL, Metinaro Díli.

Nia mós dehan, agora dadauk Sentru Formasaun Treinu F-FDTL profesionaliza  ona forsa ezérsitu, katak, instituisaun agora la´os forsa gerilia ona.

“Hanesan uluk ami mai husi gerilia, la´os  profesional  i regular, maibe depois de formasaun ida   ne´e ita sai tiha ba F-FDTL, dehan katak  forsa regular, soque  ita nia kondisoins mak seidauk kompletu,“dehan Maunana.

Alende ne´e Komandante Komponente Sentru Formasaun Treinu F-FDTL Tenente Koronel Celestino  Pinto, hateten,  komesa iha loron 19 fulan Fevereiro tinan 2001,  too tinan 2017 tama tinan 2018, Sentru Formasaun Treinu  forma ona ema 2000 ba membru F-FDTL.

`´Sentru Formasaun Treinu komesa iha Aileu mai too iha Metinaro, komera ba tinan 17, primeiru faze forsa iha mil  ital maibe krizi  2006 mosu, membru balun sai tiha. Ne´e agora tinan 2017 too 2018 atinji ona dois mil  ital,“dehan Tenente Koronel Celestino  Pinto.

Entretantu,  iha transformasaun FALINTIL ba F-FDTL iha tinan 2001, iha Aileu, hodi mai harii Sentru formasaun treinu F-FDTL, nunka halo seremonia aniversariu, tanba  pedidu Komandante sira hato´o ba Xefe Estadu Maior Jeneral foin mak aprova hodi selebra aniversariu komponente  ne´e hodi selebra nia tinan ba dala 17 iha tinan 2018 ne´e.

Partisipa iha seremonia aniversariu ne´e Adminsitrador Postu Administrativu Metinaro, família husi membru F-FDTL.avi