PNTL ho F-FDTL hala´o ezersisiu konjunta iha Baucau

Komando Polísia Nasionál Timor-Leste (PNTL) Munisípiu Baucau ho FALINTIL Forsa Defeza Timor-Leste  (F-FDTL) Komponente Terrestre Baucau, hala’o  ezersisiu  konjunta la’o ain hodi garante paz no estabilidade  ba komunidade iha Suku  Buibau, Ualili no Gariuai, ne´ebé mak durante  ne´e autoridade seguransa konsidera sempre asalta malu beibeik.

Atu evita   problema hirak ne´e, Kinta (15/03/18), Komando PNTL  Munisípiu Baucau ho F-FDTL Komponente Terrestre Baucau hamutuk ema  atus rua resin hala´o ezersisiu  konjunta la’o ain hodi  garante pas no estabilidade ba komunidade Suku  Buibau, Ualili no Gariuai,  iha Baucau.

Ezersisiu la’o ain ne´e hodi   hatudu katak, Baucau moris  iha ambiente hakmatek hodi hasoru eleisaun antesipada.

“Ezersisiu  ne´e  ho nia  objetivu, ita atu festeza  ita-nia festa eleisaun antesipada, tanba   ne´e  ita ténki halo ezersisiu konjuntu entre Komando F-FDTL Komponente Terrestre Baucau, no eskuadra ida husi Polísia Militar e PNTL Baucau rasik oinsa atu  bele garante estabilidade no hakmatek ba ita nia komunidade,“esplika Segundu Komandante PNTL Munísipiu Baucau, Superentindente Assistente Joni Viana, ba GMN iha Sede Suku Uailili Baucau.

Tuir Joni Viana, kazu  ne´ebé mak PNTL Baucau identifika  durante ne´e  iha Suku  Buibau, Ualili no Gariuai halo chek point no asalta malu, tuda ema nia kareta. Kazu  sira ne´e akontese entre  fulan Janeiro to´o Marsu ne´e.

“Iha fulan Marsu  loron 8,   akontese  joven sira ataka malu iha Eskola Presekundaria Ualili nian, ita nia Eskuadra Vila forsa Rezerva ka Task-Force  no hetan apoiu husi Polísia Militar no Komponente Terrestre   ita kaptura kedas suspeitu no vitima hodi lori ba Eskuadra Baucau  no  ita halo  prosesu, finalmente  husi  prosesu ne´e parte vitima ho suspeitu sira konkorda atu rezolve tuir kultura timor e rezolve tuir familiar,“dehan Joni Viana.

Alende ne´e  iha loron 10 fulan Marsu foin lalais  ne´e mosu tan  akontesimentu ne´ebé mak diskonfia problema entre  grupu artemarsiais no grupu partidu balun.  Maibe Joni Viana, seidauk esplika detalhus  informasaun kazu  rua ne´e lolos, tanba ténki liu husi prosesu investigasaun.

Maibe nia dehan, iha akontesimentu ne´e  Polísia Eskuadra Bacau Vila  bolu vitima  nain tolu no suspeitu nain 6  hodi halo  prosesu, maibe parte vitima no suspeitu lakohi simu malu. Tanba servisu Inevstigasaun Baucau inkamiña ba  Ministériu Públiku hodi prosesu  tuir dalan legal  ne´ebé mak  iha.

Iha  parte seluk Xefe Suku  Uailili, Hernani de Jesus Araújo  Robeiro,  hateten, tuir nia observasaun durante  ne´e problema sempre akontese iha Suku Uailili, Buibau, Ualili,Gariuai Samalari, halai liu ba artemarisiais hodi asalta baku malu.

“Maibe ami hamutuk   ho Polísia Ofisial Suku sira halo  esforsu oinsa mak bolu  grupu sira ne´e  hodi  rezolve,  kuandu  iha akontesimentu mak mosu kanek ruma  prosesu tuir krimi nian, “dehan Hernani.

Relasiona konflitu ne´ebé akontese durante ne´e entre juventude Suku Uailili, Buibau, Ualili, Gariuai, Samalari, Prezidente Autoridade Munisípiu Baucau, António Augusto Guterres, hateten, nia produs  ona konvite fahe ona  ba   Komando PNTL Baucau, atu involve hamutuk hodi  halo dialogu hamutuk ho komunidade sira iha Sede Suku Uailili,  Sesta (16/03/18) , hodi redus problema  ne´ebé akontese.

António Augusto Guterres dehan, wainhira  nia sei asumi kargu hanesan Prezidente Autoridade Munisípiu Baucau,  nia iha  dever no obrigasaun oinsa mak atu tane no gia povu ida ne´e la’o iha koridor Estadu nian. Hotu-hotu sinti katak, rai Baucau partensia ba nia nain tomak.

Husi  59 Suku, Postu Administrasan 6 no Aldeia 280, hatur munisípiu ida ne´e  sai munisípiu  ne´ebé koñesidu naran Baucau.

“Entaun ha´u pesoal  ne´ebé reprezenta instituisaun Estadu, iha Baucau ha´u nia dever obrigasaun mak oinsa halibur kamada sosiais hotu konsulta identidade hotu atu hakbesik a´an ba povu enkoraza  povu sira atu kria trankulidade, kria paz no dame iha sira nia Suku ida-idak,“ António Augusto Guterres.avi