PNTL identifika ona suspeitu tolok Xanana

Segundu Komandante Jeral Polísia Nasionál Timor-Leste (PNTL), Komisariu Faustino da Costa hateten,  autoridade seguransa  identifika ona  hela fatin suspeitu nain rua ne´ebé mak tolok lider nasionál Kay Rala Xanana Gusmão iha rede sosial facebook.

Maske PNTL identifika paradeitu suspeitu nain rua  ne´e, maibe Segundu Komadante PNTL Komisariu Faustino da Costa, lakohi esplika sai suspeitu nain rua ne´e  husi Munisípiu ida ne´ebe.

“Ami fó sai ona informasaun iha diário katak, ita komesa detekta ona ema balun,“esplika Komisariu Faustino da Costa, ba jornalista siraTersa (13/03/18), iha Sentru Formasaun Polísia Comoro Díli.

Tuir lolos, se mak  sai vítima iha rede sosial facebok uza ID falsu hodi trata tuir lolos hato’o keisa, maibe trata lideransa sira, Polísia rasik mak tun ba buka suspeitu sira.

“Ami hatene lider nasionál hanesan Kay Rala Xanana Gusmão, sei la hato´o keisa iha Polísia,  tanba nia okupadu ho servisu barak, maibe  suspeitu nain rua ne´e ami sei kaer,“dehan Faustino da Costa.

Faustino da Costa dehan,  PNTL  detekta ona durante ne´e akontese ema trata lider  nasionál sira akontese liu  mak  iha  redi media sosial facebook, tanba  impaktu husi sim card  ne´ebé mak  ema sosa, maibe la rejistu.  Ne´e mak iha pasu lubuk  ne´ebé mak PNTL  halo ho  kompañia fornesedor operador telekomunikasaun iha Timor-Leste  hanesan Timor-Telekom (TT), Telemor, Telkomsel, enkontru hodi detekta  problema  iha kartaun sim card.

Tanba  ne´e mak agora iha faze de promosaun husi TT no Telemor no Telkomsel katak,  se mak uza kartaun sim card ténki rejistu.

Signifika Autoridade Nacionál da Comunicação (ANC) fó ona  aviza, tuir lolos rejista no finaliza  ona iha tinan kotuk, maibe sei extende tan  to´o fulan Jullu  tinan para ema hotu  ne´ebé mak sosa kartaun ténki fila fali ba rejistu,  nia naran.

“Depois periodu ne´ebé mak termina kompañia  fornesedor tolu  ne´e sei desblokeia  total numeru  ne´ebé mak la rejistu.

“Agradese tanba ita la uza twitter no instagram , mas kompara ho media sosial facebook Timor ita barak, dala ruma balun hela iha Timor uza numeru Indonesia nian no Englaterra, maibe ita kontaktu numeru ne´e la ativu. Hanesan mós balun uza numeru Timor nian, la´os hela iha Timor, maibe halo hela operasaun iha rai liur ita detekta hotu,“dehan Faustino da Costa.

Entretantu  PNTL liu husi Servisu Informasaun Polísia (SIP),  identifika suspeitu nain rua   ne´ebé mak tolok   lider nasionál  Kay Rala Xanana Gusmão, iha fotografia  ne´ebé públika  iha rede sosial  facebook.

Tuir  fotografia  ne´ebé mak monta iha facebook  ne´e,  entre suspeitu nain rua, iha nain ida  uza kamizola partidu balun, depois  ema nain rua  ne´e  kaer  hela kamizola mutin ho marka Xanana MAX hodi hatudu liman  ne´ebé mak la respeita  ka tolok ba lider  libertador  patria Kay Rala Xanana Gusmão.

Antes ne´e, Vise Ministru Dezenvolvimentu Transporte no Komunikasaun, Inacio Moreiro,  hateten, Governu sei la totera  sidadaun Timor no se-se de´it mak uza ID falsu  hodi trata ukun nain sira liu husi rede sosial facebook.

Inacio dehan, Governu sei  buka meius hotu oinsa bele detekta,  se mak uza ID falsu hodi trata lider nasionál sira.

“Ita  iha mundu  ne´e  iha direitu  atu utuliza  media sosial,   ne´ebé mak iha maibe   labele subar a´an fali, mak koalia arbiru de´it,“dehan Inacio Moreira.avi