Aero Dili fo formasaun pilotu-mekániku ba instituisaun 3

Kompañia Aero Dili fo formasaun kona-ba Pilotu no Mekániku   ba intituisaun tolu  mak hanesan Falintil Forsa Defeza Timor Leste (F-FDTL), Polisia Nasional Timor Leste (PNTL) no Autoriedade Aviasaun Sivil hamutuk ema nain 9, oinsa pessoal sira sai pilotu no tékniku ne’ebé diak atu bele halo operasaun iha aero ba fronteira Timor Leste nian.

“Parte Kompañia Aero Dili, ne’ebé mak ami halo dadauk treinamentu, nu’udar treinamentu kontinuasaun, pilotu sira no mekániku sira hanesan kontinuasaun, atu hamoris sira-nia lisensa, no tuir formasaun fali , nune’e  sira bele lori ona sira-nia

aviaun rasik,”hatete nain ba kompañia Aero Dili, Lorenço de Oliveria ba Jornalista GMN iha nia kna’ar fatin, Tersa (11/04/2018), iha  Aero Dili, iha Timor Plaza.

Afirma Lorenço, kompañia rasik mak prepara aviaun ba formandu sira, husi formasaun sira bele hetan esperiensia liu tan, nune’e  bele asegura husi  hala’o patrullamentu ba Fronteira iha Timor Leste.

“Treinamentu ne’e durante  semana, depois hotu sei hala’o prátika iha Aeroportu Internasional Nicolau Lobato Dili, no treinamentu ne’e, oinsa atu mak ema pilotu bele lori aviaun ne’ebé diak, no mos oinsa sira bele halo operasaun iha kostal,” dehan Lorenço.

Fatin hanesan, formandu husi Autoridade Aviasaun Sivil, Cornelio Vasconselhos, realsa, sira tuir  treinamentu iha etapa rua, primeiru aprende kona-ba teoria iha aula laran area mekániku nian, no remata sei hala’o prátika diretamente ba aviaun.

“Treinamentu ba teoria refere, ami tuir durante semana rua ona, tuir orariu ne’ebé mak iha, ita bele dehan fleksibel, no instrutor sira fo livre mai ami atu bele halo ajustamentu ba ami-nia orariu, no kona-ba ba prátika ami sei hala’o semana ida nia laran, tamba ne’e ami espera katak tempu badak  ami bele hala’o ami-nia prátika ho didiak,” hatutan Cornelio.

Entretantu tuir Aleixo Verdial Almeida, Postu Tenente F-FDTL ne’ebé tuir treinamentu pilotu afirma, durante ne’e sira hetan treinamentu husi Aero Dili, ne’e diak tebes.

“Materia ne’ebé uluk ami hetan ona, ami husu fali ba ami-nia instrutor sira mai husi Amerika,  atu esplika nune’e ami bele hetan koñesimentu barak liu tanba ida ne’e nu’udar preparasaun atu lori aviaun ne’ebé mak ita iha,”subliña Aleixo.Oly