Julio Hornay apresia maturidade juventude

Komandante Jeral Polisia Nasional Timor-Leste (PNTL), Komisariu Julio Hornay, apresia kontribuisaun juventude nian, tanba kampaña durante semana rua (2) ho balun nia laran, sira garante nafatin paz no estabilidade, mezmu akontese problema kiik balun.

“Ha’u-nia oan joven sira, ami agradese teb-tebes ba imi hotu nia partisipasaun no imi hotu nia kotribuisaun ba estabilidade no paz durante kampaña la’o, tanba imi hotu-hotu nia kontribuisaun, nuudar Timoroan ita nia dever maka ne’e, ita hotu-hotu kontribui ba malu, liu-liu kontribui ba estabilidade no paz, hamutuk ho ita-nia forsa defeza no seguransa,” Komandante Jeral PNTL ba jornalista sira hafoin remata enkontru ho Prezidente Repúblika (PR), Francisco Guterres “Lú Olo”, iha Palasiu Prezidensial, Bairo Píte, Díli, Kinta (26-04-2018), hodi informa situasaun jeral iha teritoriu tomak.

Nia apela nafatin ba juventude no povu tomak Timor-Leste atu hakmatek no hatudu nafatin maturidade polítika ne’ebé hatudu ona durante kampaña hahú husi loron primeiru to’o ohin (26/4) loron.

“Mai ita hamutuk asegura estabilidade no paz iha prosesu kampaña eleitoral ba Eleisaun Antesipada (EA), para bele la’o diak, hakmatek to’o eleisaun, para ita hatudu dala ida tan ba mundu katak ita iha maturidade polítika ne’ebé makaas no forti hodi lori ita-nia rai no povu ba prosesu dezenvolvimentu ne’ebé diak liu iha futuru,”dehan Komisariu Julio Hornay.

Nia deklara, sidadaun hotu-hotu tenki kumpri lei no orden, hanesan mós ho PNTL, tanba sidadaun hotu-hotu iha lei nia leten ne’e hanesan, ne’ebé sé de’it maka viola regras ka kódiku penal, prontu atu responsabiliza ninia konsekuensia iha prosesu kriminal no mós iha prosesu disiplinar.

Objetivu husi Komando Jeral PNTL enkontru ho PR ne’e hodi informa situasaun em jeral kona-bá kampaña EA ninian, mezmu iha problema kiik balun akontese, maibé PNTL kontinua halo atuasaun imediata no neutraliza situasaun normal fila-fali no prosesu investigasaun la’o hela, hodi buka tuir suspeitu sira lori ba prosesu justisa.

Entretantu mezmu kampaña eleitoral durante semana rua ho balun nia laran ne’e akontese duni problema kiik balun, maibé ho maturidade polítiku, povu kontinua mantein paz no estabilidade.ves