Lere: Tolok líder históriku la’os timoroan

Xefi Estadu Maior F-FDTL, Major Jeneral Lere Anan Timur konsidera, ema ne’ebé tolok líder históriku sira ne’e la’os timoroan, tanba kultura Timor nian maka tenki respeita malu.

Tuir Lere, hodi lider históriku sira ne’e nia luta no sakrifísiu mak ohin loron Timor bele hetan ukun-an, tanba ne’e tenki hatudu kultura respeitu ba lider históriku sira ne’e.

Major Jeneral Lere Anan Timur deklara asuntu ne’e ba jornalista sira hafoin enkontru ho Prezidenti Repúblika (PR), Francisco Guterres Lú Olo iha Palásiu Prezidensial Nicolau Lobato Díli, Kuarta (11/4).

“Konba seguransa ami konsidera, liu-liu ba ita nia maun lider históriku sira, ba ita nia eis titular sira, ezemplu maun Xanana, maun Taur, Ramos Horta, Marí, ami fó seguransa espesiál ba sira, tanba agora demokrasia ne’e ema halo arbiru de’it.  Ezemplu iha Inglaterra ne’ebá, mai tolok ita nia maun sira ne’e moral laiha, ne’e signifika katak, ema ne’e la’os timoroan, entaun di’ak liu hasees husi Timor,”hateten Xefi Estadu Maior F-FDTL, Major Jeneral Lere Anan Timur, hafoin informa situasaun jeral iha territóriu tomak ba PR, liu-liu seguransa ba kampaiña ba partidu sira ne’ebé hahú la’o ona loron ida.

Lere argumenta, prosesu kampaiña partidu polítiku sira ne’ebé komesa ona durante loron ida (10/4), la’o  di’ak tebes, tanba povu Timor kontinua hatudu maturidade polítiku ne’ebé di’ak.

“Ita nia maun sira tenki tuur hamutuk, aban bainrua semak manan, semak lakon, tanba iha prosesu ida hanesan ne’e, ida tenki manan no ida tenki lakon. Entaun sira presiza tuur hamutuk iha diálogu hodi fó hanoin ba malu hodi halo oinsa para jerasaun foun bele la’o ba oin,”Lere fó hanoin.ías