Kazu Boby soke mate ema, Polísia investiga ona

Kazu suspeitu Boby,  ne´ebé mak kondus kareta Ranger metan  ho sapa matrikula  29-121 TL soke  bus Vitoria  dirasaun  Dili-Baucau, hodi rezulta   Brigida Moreira ho idade tinan 50 hodi hakotu iis no nain haat kanek todan submete ona ba  prosesu investigasaun iha seksaun Investigasaun Tránzitu Munisípiu Díli.

Kazu  ne´e akontese Tersa (01/05/18) tuku  rua, madrugada iha area  kruzamentu Audian diresaun Bemori no tun ba diresaun Eskola Paulo VI Dili.

Vítima sira  ne´ebé mak kanek oras ne´e hala´o hela tratamentu iha Hospital Nacional Guido Valadares (HNGV).

Hafoin akontesimentu Polísia Unidade Tránzitu to´o kedas iha  fatin hodi halibur dadus no lori kareta Ranger no bus Vitoria ba Komando Munisípiu Díli.

Tuir kronolojia haktuir husi vítima Lazaro Fonseca Correia fo sasin katak, nia ho bus Vitoria atu ba Munisípiu Baucau no derepenti karreta Ranger mai husi diresaun Eskola Paulo VI hodi soke bus ne’e iha kruzamentu, tanba  kareta  Ranger halai kontra sinais tranzitu ho diresaun Eskola Paulo Sestu ba Bemori.

“Imi labele temi fali lider F-FDTL ninia  oan, maibe ita temi de´it si A ka B mak  involve asidente tráfego ita  labele temi  fali lider F-FDTL nia oan, nia aman  la sala ida, bainhira   oan mak halo sala responsabiliza rasik,“esplika Komandante Jeral PNTL Komisariu Julio Hornay, ba GMN Kuarta (02/05/18), iha  Kuartel  Jeral PNTL Díli.

Wainhira husu kona ba deskonfia rai kilat  iha kareta Ranger laran? Julio  Hornay, hatán katak, nia parte seidauk  bele esplika detallu, tanba kazu ne´e sei iha  prosesu  investigasaun hela, bainira   iha ona rezultadu mak sei esplika klaru ba  públiku. Ne´ebé laiha ema ida mak iha lei nia leten,  se de´it mak  uza sasan  la tuir nia dalan ténki simu konsekuensia.

Entretantu  tuir imajen   GMN hatudu katak,  kareta  Ranger ne´ebé  Boby, kondus  ho sapa matríkula  29-121 TL, taka stiker fitun tolu.

Relasiona  ho kazu ne´e, Julio Hornay hein de´it rezultadu husi  investigasaun hotu  ne´ebé mak sei hala´o hela husi seksaun investigasaun Unidade Tránzitu Munísipiu Díli.avi