Lere rekomenda ba Governu, Valoriza Komandante Maunana, Aluk, Sabika ho Falur

Xefi Estadu Maior Jeneral Falintil- Forsa Defeza Timor Leste (F-FDTL), Major Jeneral Lere Anan Timur, rekeomenda ba Estadu ho Governu atu valoriza sakrifisiu Komandante FALINTIL Maunana, Aluk, Sabika ho Falur Rate Laek.

Tuir Lere Anan Timur katak, komandante FALINTIL  nain hat (4) aten brani no disiplina tebes hodi dedika sira nia vida tomak lori komanda guereleiru sira seluk to’o mai ukun rasik an.

“Komandante Aluk, komandante Maunana, komandante Sabika ho komandante Falur Rate Laek, ne’e hotu-hotu koñese, la’os Timor de’it maka koñese mais jenerais Indonesia sira koñese, hanesan koeñese Lere,” hateten Lere Anan Timur ba Jornalista sira iha Palasio Prezidensial Nicolau Lobato, Dili, Kuarta (23/05/2018).

Lere aprofunda katak, rekoñesementu ba veteranus nain 4 ne’e la signifika, sira mak matenek liu no hasai kursu jeneral, maibe sira nia dedikasaun patriotismu no kontribuisaun ba libertasaun nasional hatudu duni iha pratika durante funu iha ai-laran to’o faze ukun rasik an ne’e.

“Ita militar ne’e tenki promove,  liu-liu katuas sira, agora atu ba esklarese ba polítiku sira keta ema bele politiza, ba ofisiais sira iha forsa armada laiha problema, quanto mais promove sira nain 4, mais orgullu ba ninia maluk sira, tanba sira nain 4 la’os kualker ema,” Lere Anan Timur afirma tan.

Lere Anan Timur mos dehan, balun mos foti kestaun tanba saida mak la promove ‘Koliati’ ho Pedor Klamar Fuik, maibe bolu sira reforsa fileira FALINTIL nian. Tanba ne’e, Pedro Klamar Fuik ho Koliati, la bele koloka sira nia an hanesan komandante FALINTIL nain 4 ne’e.

 Lere Anan Timur haktuir katak,  agora sira (Governu-red)tenki esforsu, sé maka atu ba Jeneral tenki hasa’i kursu Jeneral, sé maka atu ba komanda sai Xefi Estadu Maior Jeneral tenki hasa’i kursu Xefi Estadu Maior Jeneral.

“Labele hanesan ha’u, ha’u lori ha’u nia exeperiensia ai-laran ninian mai komanda forsa armada, ha’u la hasa’i kursu Jeneral, ne’e maka kuandu ha’u ba reuniaun ho Xefi Estadu Maior Jenerais iha mundu, ha’u dehan ha’u maka ki’ik liu, mais dalaruma imi seidauk oho ema ida, ha’u oho ema barak ona,” hateten Lere Anan Timur. eus