Lere: Tempu ona lori nasaun ba oin

Xefi Estadu Maior Falintil-Forsa Defesa Timor Leste(F-FDTL) Major Jeneral Lere Anan Timur hateten, tempu too ona atu povu Timor, liu-liu jerasaun foun atu fanu ida-idak nia konsiensia nasionalismu no patriotismu hodi lori nasaun ba oin.

“Hanoin katak ita nia jerasaun foun, ita nia povu tempu to’o ona atu fanu nia konsiensia nasionalismu no patriotismu atu lori nasaun ba oin.”Major Jeneral Lere Anan Timur hato’o lia hirak ne’e ba jornalista sira hafoin partisipa iha misa agradesimentu hodi selebra loron restaurasaun independensia 20 de maiu ba dala XVI iha Igreja Motael Díli, sesta(19/5).

Tuir Lere, maski ohin loron Timor Leste Nasaun kiik no kasian maibe iha futuru mai Nasaun ne’e sei sai hanesan Nasaun boot sira seluk ne’ebé dezenvolvidu kleur ona.

“Hanoin katak tinan 16, la’os barak, mas la’os oituan, Hanesan ohin ha’u dehan tinan tinan em vez de ita proklama para ita kontente, ita halimar, ita halo diskursu oi-oin. Maibe momentu ida mos atu ita refleta saida mak ita halo diak husi kotuk i saida mak ita tenki prepara-an ba futuru nian, ida mak importante liu.”Lere hatutan.

Major Lere mós fiar ba oin governu no estadu sei halo esforsu tomak hodi dezenvolve diak liutan Timor Leste.

“Ita nia governu no estadu sei halo esforsu hotu, atu halo oinsa para ita nia rai lulik ida ne’e bele buras liutan.”Lere argumenta.ías