PM Alkatiri la intervén independensia judisiál

Partidu polítiku balu, liuhusi sira-nia serbisu informasaun ba públiku, hato’o informasaun ne’ebé la loos kona-ba serbisu setór justisa nian. Liu-liu, iha loron balu ikus ne’e mosu informasaun iha públiku katak S.E. Primeiru Ministru Dr. Mari Bim Amude Alkatiri hapara prosesu auditoria ba Zona Espesiál Ekonomia Sosiál Merkadu (ZEESM) ne’ebé Primeiru Ministru rasik mak husu ba Tribunal das Kontas atu halo.

Liu husi komunikasdu imprensa neébe GMN simu Domingu (6/5/2018), Porta Voz Ofisiál Governu Konstitusionál Dahituk nian, Sekretáriu Estadu ba Konsellu Ministru no Komunikasaun Sosiál Matias Boavida klarifika katak informasaun ne’e la loos no auditoria ne’e kompeténsia husi Tribunal das Kontas nu’udar órgaun judisiária ne’ebé Governu la halo intervensaun.

“La’ós karakter Primeiru Ministru Dr. Mari Alkatiri nian atu halo intervensaun ba serbisu justisa husi órgaun judisiária, lahanesan ho ema seluk,” hatete Sekretáriu Estadu Matias Boavida. “Auditoria ba ZEESM no sira seluk hala’o husi Tribunal das Kontas ne’ebé hala’o ninia serbisu ho independensia, no tanba ne’e laiha lójika ba tribunal atu hapara auditoria,” tenik Sekretáriu Estadu.

“Públiku Timor-oan se deit mak hakarak atu hatene lia-loos kona-ba asuntu ida-ne’e, diak liu konfirma ho Tribunal das Kontas,” Sekretáriu Estadu ba Kosellu Ministru no Komunikasaun Sosiál Matias Boavida konklui. */nia