Júlio Alfaro nia oan prontu lori kazu disputa rai ba Tribunal

Emprezariu Timor oan, Júlio Álfaro nia oan feto Dória Araújo, hatete, nia prontu lori kazu disputa rai iha Aldleia Vale, Lahane Oriental ba Tribunal hodi bele desidi.

“To´o  iha Tribunal mak sei hateten  rai ne´e partensia ba se nian, para ita labele koalia dada naruk. Rai  ne´e eransa husi ha´u-nia inan-aman nian señor Júlio Álvaro ho Santina Araújo, ne´ebé rai  ne´e eransa ba ha´u  oan feto, para  ita labele dada naruk tan asuntu ida ne´e orsida problema naruk,“esplika rai nain Dória Araújo, ba GMN Kinta (07/06/18) iha nia hela fatin Aldeia Vale Lahane Oriental Díli.

Nune´e mós, Dória Araújo,  hatudu dokumentus kona-ba rai nian kompletu desde  malae Portugues hodi kontinua mai Indonesia no dokumentus  Timor nian mós kompletu.

“ Rai ne´e ami iha surat kompletu husi malae Portugues, Indonesia no iha dokumentus  Timor nian. Ne´ebé ami sei la ba hadau  ema nia rai, ami koalia buat ne´ebé mak ami nian. Se karik maluk balun mak la kontente ka dehan la´os ami nian dalan ikus mak ita ba Tribunal, Tribunal mak sei hakotu iha ne´eba,“dehan Dória Araújo.

Kona-ba rai nia luan, Dória Araújo, hateten, wainhira to’o Tribunal mak sei fó sai.

Alende ne´e disputa rai ne´e akontese, tanba durante ne´e rai ne´e uza hanesan kampo hodi tebe bola entre juventude Aldeia Vale, Suku Lahane Oriental  no Lahane Osidental. Maibe ikus mai Emprezariu Timor oan Júlio Álvaro deklara kampo  ne´e rai partensia ninian.

Tanba ne´e komunidade sira desidi halo mediasaun dala barak ona ho Emprezariu Júlio Álvaro, maibe la hetan solusaun. Maske nune´e Júlio Álvaro, Maske nune´e, Júlio Álvaro, ‘la pusing’ aluga kareta hodi ba hatun fatuk iha kampo laran ne´e. Tamba ne’e implika komunidade Aldeia Vale, Suku Lahane Oriental, mobiliza  malu hodi halo intervensaun ba trava kareta sira atu labele hatun fatuk iha kampo laran.

Tuir observasaun GMN Kinta (07/06/18) iha Aldeia Vale fatin lokalizasaun  disputa rai ninian,  situasaun la´o hakmatek, la hanesan situasaun iha loron Kuarta (06/06/18), ne´ebé mak komunidade nakonu iha kampo laran no estrada ibun hodi halo protestu ba Júlio Álvaro ne´ebé mak haruka kareta kameoneta tolu atu ba fakar fatuk.avi