Lere : Harii Tribunal Militar presiza RH

Xefe Estadu Maior Falintil-Forsa Defeza Timor Leste (F-FDTL), Major Jeneral Lere Anan Timur, hatete atu harii Tribunal Militar presiza investe iha Rekursu Humanu (RH), hodi eleva diak liutan koñesimentu iha area juridiku nian.

“Tribunal Superior Militar ida ne’e hotu-hotu ba kapasitasaun kapasidade Rekursu Humanus, sé ita sei kritika ita nia area juridika querzer sira halo buat ruma ka lae, sala ne’e la’os por konsensia ka premiditasaun ka laiha, dala ruma falta de preparasaun no kapasidade,” afirma, Lere Anan Timur ba Jornalista sira iha Palasio Prezidensial, Nicolao Lobato, Bairo Pite-Dili, Kuarta (06/06/2018).

Major Jeneral Lere Anan Timur hatutan katak, harii Tribunal Militar tenke iha Rekursu Humanus ka ema ne’ebe iha kapasidade, sé laiha buka meius ne’ebe simples hatama tiha militar ida ka rua iha Tribunal sivil ne’eba kuandu kazu Militar sira mak ba rezolve.

Maibe, Jeneral Fitun Rua ne’e dehan to’o agora seida’uk realiza militar ida ka rua ba Tribunal Sivil, satan atu harii Tribunal Militar.

Veteranus 24 Anos nee iha espransa bo’ot katak  tarde ka sedu sei harii Tribunal Militar, tanba Rekursu Humanus iha rai liur iha, tanba sá iha Timor labele.

“Timor nia ulun ne’e la’os fatuk, ulun hanesan ema seluk-seluk nia ulun ne’e, kakutak mos hanesan deit kór mak dala ruma la hanesan balun metan, balun mutin matenek ne’e ita hotu-hotu matenek, la’os ema rai seluk deit mak matenek,” afirma, Lere Anan Timur.

Iha oportunidade ne’e, Lere Anan Timur husu ba Oitavu Governu Konstituisional atu eskolla Ministru Defeza ne’ebe mak hatene konaba servisu Militar nian, la’os ema kuzineiru ba lori fali kareta, kareta bele baku fila.

“Ha’u hanoin ida nene’e, pelemenus ne’e husu konprendesaun ne’ebe mak atu mai Governu fo Ministru Defeza ne’ebe komprende konaba militar,” dehan, Lere Anan Timur. Eus