Ohin, Koronel nain haat promove ba Brigadeiru ■Lere: Konsellu militar sei forte liu

Instituisaun FALINTIL-Forsa Defeza Timor-Leste (F-FDTL), ohin, Kinta (07/06/18), promove Koronel nain haat (4),Koronel Falur Rate Laek, Koronel Sabika, Koronel Aluk, no Koronel Maunana, ba Brigadeiru Jeneral F-FDTL.

Seremonia promosaun ne’e sei hala´o iha Palasiu Prezidensial, Bairo-Pite-Díli, ne’ebé sei lidera husi Prezidente Repúblika, Francisco Guterres ‘Lú Olo’.

“Aban   (ohin-red) sei iha  promosaun ba Koronel nain  haat.  Ha´u  rona  polítika balun la konkorda protesta, ha´u  dehan politika sira ne´e dala ruma uluk la hadomi  ita-nia rai, dala ruma la terus hanesan sira nain hat terus  ne´e. Tan ida ne´e mak sira kestiona kona-ba profisionalizmu kona-ba  brigada.  Ha´u bele dehan nu’udar forsa armadas nia Komandante ha´u dehan katak, ita-nia forsa armadas nunka hetan brigada to´o Timor ne´e naben, até  iha guerrilha mós laiha brigada ida, iha brigada  vermelha la han malu  ho efetivu,“esplika Xefe Estadu Maior Forsa Armadas F-FDTL Major Jeneral Lere Anan Timur, hafoin enkontru semanal  ho Prezidente Repúblika Francisco Guterres ‘Lú Olo’, Kuarta (06/06/18) iha Palasiu Prezidensial Bairo-Pite, Díli.

Tuir Lere, sira nain haat  promove  ne´e bolu dehan promoção por distinção. “Ne´e la´os arbiru de´it, distinsaun ema ne´ebé  rekoñese.  Primeiru ema ne´ebé mak harii Estadu ne´e, sira nain haat mós faz parte. Sira nain hat  ne´ebé atu  promove ne´e la´os sira mak matenek liu, rekoñesimentu Estadu ba ninia ema sira ne´e fó kontribuisaun ba harii nasaun ida ne´e. Se ita rekoñese ema  ne´ebé mak uluk lakohi  ukun a´an sai Ministru sai deputadu, nusa mak ita la rekoñese sira nain hat  asegura sobrevivénsia FALINTIL bele  ohin loron hatutan ba Forsa Defeza Timor-Leste,“hatutan Lere.

Lere Anan Timur  mos argumenta, nia la interese sira nain haat ne’e tuir formasaun hodi hasa’e kapasidade ka abilidade.

“Ha´u dehan la interese formasaun sira katuas tiha ona, mínimu 60 anos, ho promosaun ida ne´e ba tinan ida rua ami ba hotu reforma. Kuandu promove sira nain hat entaun ami nain nen ona, komesa aban ba oin ne´e labele kompara fali ba kotuk militar ida forte a  nivel Konsellu  militar ne´ebé mak forte toma desizaun no Governu mós ténki rona, ami la´os toma desizaun de´it  ba militar maibe dala ruma ami to’o área polítika, area partidu mak la tama,“dehan Lere.

Iha  oportunidade ne´e, Xefe Estadu Maior Forsa Armadas F-FDTL Major Jeneral Lere Anan  Timur, responde mós preokupasaun eis Sekrtetariu Estadu Defeza, Júlio Tomas Pinto, ne´ebé mak husu   justifikasaun kona-ba atu promove Koronel nain haat ba Brigadeiru Jeneral.

“Ita-nia eis Sekretariu Estadu hanoin katak nia nunka  militar nia koalia iha surat  ne´eba mas nia la domina militar, nia foin dadauk ba Sekretariu Estadu Defeza mós nia la domina tan. Ita lalika koalia kona-ba efetivu, ita hotu hatene ita-nia efetivu to´o 2020 ténki atinji 3.600. Ne´e númeru autorizadu, mas bele liu depende misaun ne´ebé mak Estadu fó ba Forsa Armadas. Ezemplu Singapura nasaun kiik liu ita nian nusa mak nia Forsa Armas ne´e bo´ot,“dehan Lere.

Antes tama ba serimonia,  iha Kuarta (06/06/18) membru FALINTIL Forsa Defeza Timor-Leste (F-FDTL), hala´o parada  militar  iha Palasiu Prezidensial Bairo-Pite hodi prepara partisipa iha seremonia realizasaun promosaun deviza ba  Koronel nain haat ba Brigadeiru Jeneral ne’e.avi

Leave a Reply

Your email address will not be published. Required fields are marked *