KOMBUSTIVEL LAIHA, LERE HUSU KOMANDANTE SIRA DEVE

Xefe Estadu Maior F-FDTL Major Jeneral, Lere Anan Timur, husu ba komandante sira bainhira kareta  hodi hala´o servisu nian mak kombustivel laiha, husu atu deve, maibe deve ténki ho nota.

“Ai ha´u-nia komandante balun telefoni dehan, Jeneral ami iha uma mak komanda, ha´u dehan imi komanda oinsa agora kareta labele halai, agora husi telefoni de´it. Dezaraska o ba deve mina tau nota didiak, kuandu situasaun hakmatek o lori mai, mas ténki transparente lolos, mas sira halo ka lae,“Lere Anan Timur, ba jornalista  sira Sesta (20/07/18), hafoin ensera  kursu operasional manutensaun paz ONU ninian, iha Sentru Treinamentu F-FDTL, Metinaro, Díli.

Lere hatutan, oras ne’e dadauk mos  kona-ba hahan  iha postu sira  hasoru problema.

“Agora sira atu han saida? tanba sira hotu-hotu depende ba sira-nia osan ransu.  Entaun  ha´u dehan ba sira, imi labele depende demais ba Komando. Han nian ne´e ha´u la  fiar  iha fatin ne´ebé imi hela povu  la konfia imi, imi ba kios bo´ot dehan ami osan laiha ami deve depois osan iha ami selu fila-fali,“dehan Lere.

Lere hatutan, António mak deve, ema la fiar, maibe instituisaun mak deve  problema laiha.

“Agora ne´e mak ha´u hateten ba Komandante sira espiritu inisiativa ida ne´e mak importante liu. o  labele buat kiik atu  fuma sigaru ida mós o ténki husu mai Jeneral,  ami sigaru laiha, mas ténki inisiativa,“dehan Lere.avi