FALUR: PR HUSU HASA’E DISIPLINA IHA FORSA ARMADA

Xefi Estadu Maior Forsa Armada Brigadeiru Jeneral, Falur Rate Laek, hatete,  Prezidenti Repúblika (PR), Francisco Guterres ‘Lu-Olo’ husu atu hasa’e Falintil-Frosa Defeza Timor-Leste (F-FDTL) sira-nia disiplina ba situasaun servisu ne’ebé sira hasoru.

“Ha’u reprezenta jeneral Lere Anan Timur, tamba jeneral iha auzensia iha país, tamba ne’e ha’u mai fo situasaun forsa nian kona-ba servisu operasionais, atividade diária, ho alimentasaun sira, situasaun pesoal, lojístika no seluk tan,” dehan Falur ba Jornalista Kuarta (1/08/2018) iha Palasiu Prezidensial Nicolau Lobato Bairo Pite Díli.

Nia afirma, pontu hirak ne’e mak nia halo relatoriu oinsa efetivu ba servisu iha postu no atividade saida mak forsa sira hala’o iha postu, no prosesamentu ba lojístika la’o oinsa, no formasaun treinamentu la’o oinsa, ida ne’e mak nia informa ba Prezidenti Republika.

“Prezidenti nia reposta ba asuntu ne’ebé ha’u hato’o mak, husu ha’u para mantein operasionalidade forsa nian, hasa’e nivel disiplina, rezolve problema lojístika, no husu ba Estadu Maior atu jere oinsa, para sira bele apoiu  sira-nia família nia situasaun” sublina nia. Oly