Filomeno Paixão garante, Semana ne´e rezolve krizi kombustivel iha PNTL ho F-FDTL

Prezidente Repúblika (PR), Francisco Guterres ‘Lu Olo’ promulga ona dotasaun orsamentu temporariu  millaun US$140. Tamba ne’e, Ministru Defeza nu’udar mos Ministru Interior Interinu Filomeno Paixão, garante katak, semana ne´e bele rezolve ona krizi kombustivel  iha instituisaun Polísia Nasionál Timor-Leste (PNTL) ho FALINTIL Forsa Defeza Timor-Leste (F-FDTL).

“Ha´u  rona dehan  osan  Prezidente  Repúblika promulga ona, ha´u fiar katak semana  ne´e bele loke  fila-fali ona osan kontabilidade ba iha servisu  públiku hotu-hotu ne´ebé ha´u fiar semana ida ne´e bele rezolve kombustivel ba PNTL no F-FDTL,“esplika  Ministru Defeza, Filomeno Paixão, ba GMN Segunda kalan (13/08/18), hafoin partisipa iha Grande Entrevista iha Studio 2 GMN Bebora Díli.

Ministru ne´e mós rekoñese, instituisaun defeza no seguransa iha dívida ba kombustivel ho hahan.  Kona-ba montante dívida Governante ne´e la fiksa, maibe Estadu iha osan hodi selu  dívida hirak ne´e.

Antes ne´e mós Xefe Estadu Maior F-FDTL Major Jeneral Lere Anan Timur, husu ba membru sira atu deve mina husi kompañia sira atu hodi hala’o servisu, maibe ténki halo nota.

Entretantu Komandante Jeral PNTL Komisariu Julio Hornay hateten, PNTL mós infrenta krizi kombustivel hodi kobre atividade operasional iha terrenu.avi