Lere: Hatun prosesu disiplinar ba membru F-FDTL komete kazu tiru iha Maliana

Xefi Estadu Maior F-FDTL Major Jeneral, Lere Anan Timur, hatete,  bazeia ba relatoriu ne’ebé nia simu ona husi ekipa konjunta ne’ebé hala’o investigasaun kazu tiru iha Postu Administrativu, Munisípiu Bobonaro, no nia halo ona despaixu atu hatun prosesu disiplinar ba membru F-FDTL nain 12 kompostu husi kapitaun nain 1 tanenti nain 1 no soldadu nain 10.

“Loke tiha sira-nia prosesu final mak  foin ita haree sira sala ka lae? se sala nia todan  oinsa? depois ha’u uza ha’u-nia kompetensia hodi toma desizaun foti medidas ba sira, ne’ebé komete sala ne’e, hanesan uluk ha’u dehan ona, ne’e mais kestaun disiplinar interna ami nian,  ba kestaun judisiáriu nian ne’e ligadu ba krimi, ne’e Tribunal mak sei responsabiliza ba ida ne’e,” dehan Lere Anan Timur ba Jornalista sira, hafoin remata enkontru ho Prezidenti Repúblika Francisco Guterres ‘Lu Olo’, Kuarta (29/08/2018), iha Palasiu Prezidensial (PR) Nicolau Lobato, Bairo Pite, Díli, hodi informa situasaun jeral rai laran nian ba PR.

Nia afirma, kazu refere mak la to’o tribunal, no kuandu to’o deit ba nia, nia sei toma desizaun ba nain 12.

“Haruka ona fila ba komponente, maske ba iha komponente mos sei iha situasaun detidu nafatin, maske sira nain hira iha problema ruma ho sira-nia família, mak sira atu ba uma,  tenki eskoltadu, armada akompaña lori ba no lori fila. Tamba ne’e mak  ONG sira la bele dehan katak, ami husik deit sira, maibe ami nunka husik, ita nu’udar Timor-oan,  ema ne’ebé mak komete sala, tenki eduka sira, atu sai Timor-oan ho didiak,  ida ne’e mak pozisaun ami nain 2 Komandante PNTL ninian,”hatutan Lere.

Lere dehan tan, maske nune’e maibe prosesu ne’e sei lori tempu, tamba sira mos iha direitu defende sira-nia a’an, no agora se mak atu fo dadus lolos ka evidensia lolos ne’e, ba sira ne’ebé iha terenu hanesan testamuña.

“Sira nain hira ne’e la lori ona kilat, tamba detidu ona, no la iha  servisu ida ne’ebé fo ba sira, a não ser que sira-nia servisu mak  hamos rai no fase bikan, sira la bele lori kilat, no ofisial la bele komanda forsa, tamba iha situasaun detensaun,”subliña Lere.Oly