PR sei nomeia BrigJen ida troka Paixão

Xefi Kaza Militar, Antonio da Silva “Maucalo”, informa, Prezidenti  Repúblika (PR), Francisco Guterres ‘Lu Olo’, konvoka  reuniaun Konsellu Superior Defeza no Seguransa atu fo hanoin hamutuk, nune’e iha tempu badak nomeia entre Brigadeiru Jeneral (Brigjen) Domingos Raul ‘Falur  Rate Laek’ no Brigadeiru  Americo Ximenes ‘Sabika’, atu ida bele asumi  kargu nu’udar Vise Xefe Estadu Maior FALINTIL Forsa Defeza Timor-Leste (F-FDTL), hodi troka Filomeno Paixão  ne’ebé antes ne’e asumi kargu refere.

“Asuntu prinsipal ne’ebé Prezidenti Repúblika koalia ho Konsello Superior Defeza no Seguransa, kona-ba nomeiasaun Vise Xefi Estadu Maior  Jeneral F-FDTL, tamba tuir lei artigu 86 konstitusaun  RDTL hatete katak, bainhira Prezidenti  Repúblika, atu halo  nomeasaun ba Xefi Estadu   Maior  Jeneral F-FDTL no Vise, presiza tenki  konsulta antes ba Konsellu Superior Seguransa”, dehan Xefi Kaza Militar Maucalo ba Jornalista sir, hafoin remata  enkontru Konsellu  Superior Defeza no Seguransa, Tersa (21/08/2018), iha Palasiu Prezidensial Nicolau Lobato, Bairo Pite, Díli.

Nia hatutan, reuniaun ne’e konsellu superior defeza seguransa hato’o ona sira- nia hanoin katak, ba nomeiasaun  refere desizaun entrega hikas ba Prezidenti Repúblika mak bele desidi ho nomeia.

Nia akresenta, ho ezonerasaun Vise Xefi Estadu Maior Jeneral  uluk Filomeno Paixão atual Ministru Defeza, tanba husik  hela vaziu ida mamuk iha instituisaun F-FDTL, nune’e mak iha Reunaiun refere, fo duni importansia, presiza tenki halo duni noemeasaun atu bele halo funsaun, liu-liu ba militar nian,  liu liu espesifikamente ba area justisa no disiplina, no nesesariu ba instituisaun ne’e atu funsiona diak, presiza estrutura kompletu.

“Tuir proposta mai husi Governu, aprezenta proposta kandidatu rua, ida mak Brigadeiru  Falur Rate Laek , no ida seluk mak Sabika. Maibe ita haree bainhira Prezidenti atu halo nomeasaun karik  tenki rona lai Konsellu Superior Defeza Seguransa, ita haree ema hirak ne’e mesak rezistensia, maibe fila fali Prezidenti Repúblika mak nomeia tuir konstituisaun haruka”,dehan Maucalo.Oly