Ema sona mate Komandante Postu Polísia Hera nia oan mane

Ema deskoñesidu sona mate Carlos da Costa ho idade tinan 17, oan husi   Komandante Postu Polísia Nasional Timor-Leste, Hera, Munisípiu Díli, Domingos Costa Lay.

Kazu ne´e akontese iha Eskola Sekundaria Vokasional Hera, iha Domingu, loron 16, fulan Setembru, mais ou menus tuku tolu  madrugada OTL.

Tuir Polísia Nasional Timor-Leste iha Sabadu kalan, vítima Carlos da Costa, partisipa iha festa koremetan ida iha Hera to’o kuaze tuku rua ho balun madrugada

Hafoin ne’e, Carlos koalia  ho ninia kolega Beti Manuela Tilman idade 12 , iha eskola Sekundaria  Vokasional Hera,  maibe derepente ema deskoñesidu ida mosu no tuku Carlos to’o monu tun ba rai.

Ho nune’e,  ema deskoñesidu ne’e aproveita rasta Beti Manuela Tilman ba eskola kotuk no tenta atu halo abuzu  seksual no hakanek vítima  ninia isin lolon balun.

Tanba  ne´e  matebian Carlos halai ba atu salva Beti maibe  suspeitu kaer tudik no sona  Carlos iha ninia kabun no rezulta vítima mate iha fatin.

Mate isin evakua ona husi fatin akontesimentu mai morturariu Hospital Nacional Guido Valadares hodi submete ba prosesu autopsia.

Inan husi matebian Alda Maria da Silva ho aman Domingos  Costa Lay husu autoridade seguransa atu kaptura suspeitu deskoñesidu ne´e hodi bele submete ba prosesu investigasaun.

Domingos Costa Lay nu´udar Aman atual Komandante Postu Hera hateten, nia entrega  tomak  prosesu kazu  ninia oan mane matebian Carlos da Costa  ba Polísia atu  buka suspeitu deskoñesidu hodi subemete ba  prosesu investigasaun.

“Ha´u lakon tiha ona ha´u-nia oan mane primeiru, ne´ebé kazu ninia prosesu ha´u entrega ba  ha´u-nia komandante investigasaun Polísia sira  hodi buka rekolla informasaun ne´ebé mak klean atu nune´e ita bele hatene suspeitu ne´ebé sona ema barak-barak termasuk ha´u-nia oan Carlos nia sona ne´e,“esplika Domingos  Costa Lay  ba GMN, Domingu (16/09/18), iha Sukaer Laran Hera.

Alende ne´e, Alda Maria da Silva, nu´udar Inan, ejije ba autoridade seguransa atu buka no kaptura suspeitu ne´ebé mak sona mate nia oan mane Carlos da Costa.

“Ha´u husu ba Polísia sira tau matan hodi buka suspeitu ne´ebé mak oho ha´u-nia oan mane, ha´u-nia oan la sala buat ida,“dehan Alda Maria da Silva .

Entretantu vítima Beti Manuela Tilman oras ne’e halo hela tratamentu iha Hospital Nacional Guido Valadares.

Relasiona ho kazu ne´e, GMN seidauk hetan konfirmasaun husi Komando PNTL Munisípiu Díli kona-ba lalaok husi prosesu investigasaun.avi

Leave a Reply

Your email address will not be published. Required fields are marked *