SETP entrega rai hektar tolu ba PNTL Lautém

Sekretaria Estadu Terras Propriedade (SETP), liu husi servisu Terras Propriedade Munisípiu Lautém, oferese rai hektares tolu ba Komando Polísia Nasional Timor-Leste (PNTL) Lautem.

Rai  ne´e, lokaliza iha Lospalos vila, Bairo Central, Suku Fuiloro, Postu Administrativu Lospalos, Munisípiu Lautém.

Wainhira entrega tiha rai ne´e, Komandante  PNTL Munisípiu Lautem,  Superintendente  Marcos Sequera, orienta  membru PNTL  ne´ebé mak nia lidera hodi lere duut ne´ebé naruk hela, durante loron ida.

Lider máximu seguransa iha Lautem, Marcos Sequera,  konvida komandante Jeral  PNTL Komisariu Julio Hornay, ba direta  iha Lospalos hodi lansa kuda has hun ida ne´ebé mak fuan lais iha tinan ida.

Alende ne´e, Komando PNTL  Lautem, planeia sei kuda ai  horis hanesan tomati, modo  iha laran, atu nune´e membru sira labele gasta osan  hodi sosa modo iha merkadu.

Komandante  PNTL Munisípiu Lautem,  Superintendente  Marcos Sequera, agradese  ba Sekretaria Estadu Terras Propriedade  liu husi Terras Propriedade Munisípiu Lautem  tanba  bele oferese ona rai ba  autoridade seguransa hodi uza.

“Tanba  ne´e rai  ne´ebé mak oferese  husi Sekretaria Estadu Terras Propriedades no ami hetan legalizasaun mós husi Sekretariu Estadu Terras Propriedade. Tanba ne´e mak rai  ne´e ami hamoos, se karik  iha biban ami sei fila rai ne´e hanesan izemplu ida ba juventude sira, ita la’os ba estranjeiru  hodi kuu tomati,  maibe  ita nia rai luan teb-tebes atu ita produz”,dehan Marcos Sequera.

Nia hatutan,   joven sira atu buka servisu Estadu susar, maibe rai Lautem ne´ebé mak luan teb-tebes, bele hala’o servisu ida ne’e.

 “Ita esforsu oituan-oituan, agora ema  ho tinan 20 halo toos nia bele ba Bali, kuandu nia atu tama ba agrikultur  ne´ebé profisional sempre buka konsulta ho kolega seluk oinsa bele halo to´os ne´ebé mak di’ak”,dehan Marcos Sequera.

Wainhira GMN tenta konfirma ho parte Servisu Terras Propriedade Munisípiu Lautem, kona ba oferta hirak ne’e, maibe laiha tempu atu fó informasaun.avi