PNTL kaptura joven nain rua lori rama ambon ■Povu kontinua la hakmatek

Polísia Nasionál Timor-Leste (PNTL), Munisípiu Díli, kaptura ona joven nain rua iha Segunda (03/12/18), iha área Kolmera, tanba lori rama ambon hodi motor marka Beat ida.

Joven  nain rua ne´e mak ho inisial  TD  ho AC, agora dadauk detein   ona  iha sela detensaun komando PNTL Munisípiu Díli durante 72  hodi submete ba Tribunal Distrital Díli.

Evidensia rama  ambon no motor ne´e agora asegura ona iha Munisípiu Díli.

“Klaru horikalan (Horibairuak kalan) ami  Komandu PNTL Munisípiu Díli halo check point apoiu husi Unidade Polísia Espesial  no patrullamentu Polísia Militar, iha operasaun ne´e ami  suspeitu nain rua lori arma branka, liu-liu rama ambon, iha sira ninia isin lolon“,esplika Segundu Komandante  PNTL Munisípiu Díli ba jornalista sira Tersa (04/12/18), iha Kuartel PNTL Kaikoli  Munisípiu Díli.

Antes ne’e mós PNTL kaptura ona joven balun tanba lori rama ambon hodi hala´o movimentu  iha Díli laran iha tempu kalan.

Entretantu tuir lei númeru 5/2015, armas brankas bandu ema lori sasan atu hala´o movimentu  no hakanek ema ninia vida, wainhira autoridade seguransa hetan sei kaptura hodi lori ba Tribunal.

Povu kontinua la hakmatek

Komisaun B Parlamentu Nasional (PN) trata asuntu Seguransa no Defeza bolu Komandante Jeral Polísia Nasional Timor Leste (PNTL) Komisáriu Julio Hornay hodi informa situasaun rai laran ne’ebé ikus-ikus ne’e mosu beibeik problema hodi fo implikasaun ba povu la hakmatek.

Prezidente komisaun B, Adérito Hugo da Costa, hatete, PNTL nia funsionamentu halo  atuasaun no prevensaun bainhira mosu konfrontu ruma no oinsa atu garante  seguransa tuir  ordem públiku. Maibe ikus-ikus ne’e mosu bebeik konflitu iha bairo-bairo no halo povu barak komesa la hakmatek ona.

“Tanba ne’e ho situasaun ne’ebé akontese iha rai laran, komissaun B bolu komando Jeral PNTL Komisáriu  Julio Hornay  hodi halo komunikasaun atu rona  informasaun no observasaun  situasaun iha rai laran husi ita nia PNTL, tanba Polísia  nafatin espetiva tanba uniku ajensia Estadu nian  ne’ebé responsabilidade mantein ordem públiku Polísia,  la iha tan instituisaun seluk”, dehan  Adérito ba jornalista sira,  iha Parlamentu Nasional, Tersa (4/12).

Alende ne’e deputado bankada CNRT ne’e mos  husu ba púbiku atu labele influensia  informasaun ne’ebé espalla hodi halo propaganda ba instituisaun PNTL.

Iha fatin hanesan Komando Jeral  PNTL Komisario Julio Hornay hatete, komisaun B bolu sira atu esklarese situasaun rai laran ba deputado sira. Tanba deputado sira presija informasaun ne’ebé lolos no detalhu husi PNTL.

“Ita hatene ikus ikus ne’e mosu  konfrontu entre joven sira ikus-ikus ne’e  komesa akontese fila fali iha kapitál Díli to’o rezulta ema balun mate maibé PNTL  nafatin halo operasaun iha terrenu,  nune’e mak ita mai direta iha ne’e hodi hato hela informasaun ba komisaun B ne’ebé trata asuntu Seguransa ho Defeza”,esplika Julio.

Julio Hornay husu ba komunidade atu nafatin fó konfiansa ba PNTL hodi hala’o ninia missaun seguransa,  PNTL iha prontidaun nafatin hodi hala’o nia servisu bele asegura segurasan ba povu.avi/ety