Jeca Smith husu KPK servisu imparsiál ■Estabelese ona iha Suku 24

Adjuntu Autoridade Munisípiu Díli, Jeca Smith, husu  membru Konsellu Polísiamentu Komunitária (KPK)  atu  servisu ho imparsial hodi halo prevensaun konflitu iha Suku no bairu sira iha Díli laran.

“Ita seidauk simu informasaun ruma husi KPK kona-ba sira nia servisu imparsialidade ka la imparsialidade husi KPK, mas autoridade nia liamenon mak hanesan ne’e, KPK  hamrik  iha sira ninia kna’ar  ne’ebé mak  importante atu lori duni saida mak  ita nia populasaun presiza. Alende ne’e kna’ar sira nia husi loron ba loron sira sempre hasoru ho populasaun  buka identifika problema. Ne’ebé  ita koalia kona-ba termu imparsialidade importante tebes, hanesan ha’u dehan  servisu sai KPK servisu ho hanoin  ne’ebé mak diak, maneira  ne’ebé mak neuru para lori konfiansa ba ita nia sidadaun sira durante ne’e presiza hela tulun ajuda sira sai husi sira nia problema ruma”,esplika  Adjuntu Autoridade Munisípiu Díli Jeca Smith, Kinta (15/02/19),  wainhira hamutuk ho Komandante PNTL Munisípiu Díli Superintendente Xefe Pedro Belo hodi fó pose ba Membru KPK husi Suku Lahane Osidental iha Kuartel PNTL Munisípiu Díli.

Nia hatutan,  papel KPK Polísia, la’os halo de’it prevensaun ba konflitu, maibe papel importante ida mós tau matan ema soe lixu arbiru husi komunidade no problema komunidade hadau malu be’e moos.

Atu prevene problema sira ne’e KPK buka halo identifikasaun iha bairu sira, karik populasaun ladun kumpri ordem  soe foer nian, KPK nia misaun mak atu fó hatene ba komunidade labele soe arbiru foer iha estrada ninin,   ne’e hanesan prevensaun de’it para depois labele husik hela problema refere hodi hamosu tan  problema seluk.

“Ne’ebé ha’u hanoin kna’ar KPK importante hodi fó atensaun, problema sosial no problema seguransa, problema saúde, ne’e mós imporatante ba KPK nia servisu  hanesan fó tulun ba nai liur rai  sira no tulun autoridade seguransa bele  hala’o kna’ar diak liu lori duni esperansa ba ita nia populasaun”,dehan Jeca Smith.

Alende ne’e Komandante PNTL Munisípiu Díli Superintendente Xefe Pedro Belo hateten,  KPK estabelese ona iha Suku  24, falta Suku 24 mak seidauk estabelese KPK.

“Ha’u hakarak hateten katak, KPK nia servisu ne’e foka liu ba atu halo prevensaun para labele mosu problema, kuandu membru KPK hatene informasaun ruma atu mosu problema, entaun sira ba  hodi  halo prevensaun kedas , halo mediasaun, halo ba iha kazu  ne’ebé mak kategoria ba krimi semi públiku, hanesan problema fen ho laen, no problema entre jovem sira. Krimi públiku mak  vitima lakohi hato’o keisa  KPK ho OPS bele rezolve”,dehan Pedro Belo.

Alende ne’e Xefe Suku Lahane Osidental nudar mós membru KPK,  Francisco Ribeiro Smith akresenta katak, involvimentu komunidade iha KPK inisiativa  mai husi  komunidade rasik rasik, laiha ema ruma mak obriga involve iha KPK.

“Tanba  ne’e mak ami mai tuir formasaun durante loron tolu hahú iha Tersa (13/02/19)   to’o  Kinta (14/02/19) iha Kuartel PNTL Díli. Materia  ne’ebé mak ami aprende  kona-ba oinsa  prevene  konflitu iha Suku  no iha Aldeia no materia seluk tan kona-ba seguransa ninian”,dehan     Francisco Ribeiro Smith.avi